అనంతపురం: కరోనా భయంతో అంత్యక్రియలకు బంధువులు దూరం.. మానవత్వం చాటిన ఎస్సై

కరోనా వైరస్ అందర్నీ భయపెడుతోంది. కుటంబంలో ఎవరైనా చనిపోయినా.. కరోనాతో ప్రాణాలు పోయినా అంత్యక్రియలు చేయడానికి ఎవరూ ముందుకు రావడం లేదు. అనంతపురం జిల్లా ఉరవకొండలోనూ దారుణం జరిగింది. స్థానికంగా ఓ వ్యక్తి వైరస్‌తో చనిపోయాడు. అంత్యక్రియలు చేసేందుకు ఎవరూ ముందుకు రాలేదు.. బంధువులు కూడా మొహం చాటేశారు. దీంతో అతడి భార్యకు దిక్కుతోచలేదు.

ఉరవకొండకు చెందిన ఓ వ్యక్తి ప్రైవేట్‌ ఉద్యోగం చేస్తున్నాడు. ఈనెల 15న కరోనా లక్షణాలు కనిపించడంతో వైద్య సిబ్బందికి సమాచారం ఇచ్చారు.. కానీ ఎవరూ పట్టించుకోలేదు. విషయం తెలియడంతో ఎస్‌ఐ ధరణిబాబు బాధితుడ్ని అనంతపురం తరలించారు. అక్కడ ప్రభుత్వ ఆస్పత్రిలో చికిత్స పొందుతూ గురువారం చనిపోయాడు. వైద్య సిబ్బంది నిర్లక్ష్యంతో తన భర్త చనిపోయాడని భార్య ఆరోపించారు.

అతడి మృతదేహానికి అంత్యక్రియలు నిర్వహించడానికి ఎవరూ ముందుకు రాకపోవడంతో ఎస్‌ఐ వెంటనే స్పందించారు. మృతదేహాన్ని ఉరవకొండకు తీసుకురావాలని.. అంత్యక్రియలు తాను చేయిస్తానని భరోసా ఇచ్చారు. దగ్గరుండి అన్నీ ఏర్పాట్లు చేసి అంత్యక్రియలు చేయించారు. బంధువులు మొహం చాటేసినా ఎస్‌ఐ మాత్రం అండగా నిలవడంతో.. ఆ కుటుంబం ధన్యవాదాలు తెలిపింది.