అలర్ట్.. ఆంధ్రప్రదేశ్‌కు మళ్లీ వర్ష సూచన

ఆంధ్రప్రదేశ్‌లో రానున్న మూడు రోజుల పాటు వర్షాలు కురిసే అవకాశం ఉందని అమరావతి వాతావరణ కేంద్రం తెలిపింది. అల్పపీడన ప్రభావంతో ఆంధ్రప్రదేశ్‌లో ఇప్పటికే పలు చోట్ల భారీ వర్షాలు కురుస్తుండగా.. తాజాగా మరో అల్పపీడనం ఏర్పడిందని అధికారులు తెలిపారు. ఇప్పటికే కురుస్తున్న వర్షాలతో కోస్తా ఆంధ్రా ప్రాంతాల్లో పంటలు నీటమునిగాయి.

తాజాగా ఉత్తర అండమాన్ సముద్రం దానిని ఆనుకొని ఉన్న ప్రాంతాల మీద ఉన్న అల్పపీడనం ఏర్పడిందని.. దీని ప్రభావంతో రానున్న మూడు రోజులపాటు తేలికపాటి నుంచి మోస్తారు వర్షాలు కురిసే అవకాశం ఉందని అమరావతి వాతావరణ శాఖ అధికారులు తెలిపారు. ఈ అల్పపీడనం రానున్న 48 గంటలలో మరింత బలపడే అవకాశం ఉందని చెప్పారు.

ఈ అల్ప పీడన ప్రభావంతో రేపు ఉత్తర కోస్తా ఆంధ్ర, యానాం ప్రాంతాల్లో ఒకటి రెండు చోట్ల ఉరుములు, మెరుపులతో కూడిన భారీ వర్షాలు, మిగిలిన ప్రాంతాల్లో తేలికపాటి వర్షాలు కురిసే అవకాశం ఉన్నట్లు అధికారులు తెలిపారు. ఎల్లుండి కొన్ని చోట్ల తేలికపాటి వర్షాలు, ఒకటి రెండు ప్రాంతాల్లో భారీ నుంచి అతి భారీ వర్షాలు కురిసే అవకాశం ఉందని చెప్పారు. అదేవిధంగా దక్షిణ కోస్తా ఆంధ్ర, రాయలసీమలో రేపు, ఎల్లుండి కొన్ని ప్రాంతాల్లో తేలికపాటి నుంచి మోస్తారు వర్షాలు, ఒకటి లేదా రెండు ప్రాంతాల్లో భారీ వర్షాలు కురిసే అవకాశం ఉందన్నారు.