ఏపీకి మరో మూడ్రోజులు వర్ష సూచన.. ఈ జిల్లాల్లోనే

మధ్యప్రదేశ్‌లో కొనసాగుతున్న అల్పపీడనం బలహీనపడింది. మరోవైపు తమిళనాడు తీరంలో నైరుతి బంగాళాఖాతం మీదుగా ఉపరితల ఆవర్తనం కొనసాగుతోంది. ఇటు దక్షిణ ఛత్తీస్‌గఢ్ వరకు మరో ఉపరితల ఆవర్తనం ఏర్పడింది. వీటి ప్రభావంతో వాయువ్య బంగాళాఖాతం పరిసరాల్లో ఈనెల 13న అల్పపీడనం ఏర్పడే అవకాశం ఉందని వాతావరణ శాఖ తెలిపింది. ఈ ప్రభావంతో కోస్తాలో ఓ మోసర్తు నుంచి భారీ వర్షాలు కురుస్తాయని వాతావరణశాఖ చెబుతోంది.

ఇదిలా ఉంటే కోస్తా, రాయలసీమ, ఉత్తరాంధ్రలో మంగళవారం కూడా వానలు పడ్డాయి. ఉత్తరాంధ్రలో అనేకచోట్ల భారీ వర్షాలు, ఇతర ప్రాంతాల్లో తేలికపాటి నుంచి ఓ మోస్తరు వర్షాలు కురిశాయి. బుధ, గురువారాల్లో రాష్ట్రవ్యాప్తంగా తేలికపాటి నుంచి ఓ మోస్తరు వర్షాలు కురిసే అవకాశం ఉందని అమరావతి వాతావరణ కేంద్రం తెలిపింది. ఈనెల 14, 15 తేదీల్లో ఉత్తరాంధ్రలో భారీ వర్షాలు కురిసే అవకాశం ఉందని తెలిపింది. కొన్ని జిల్లాల్లో భారీ వర్షాలు కురువడంతో వాగులు, వంకలు పొంగి పొర్లుతున్నాయి.