రఘురామపై తక్షణమే అనర్హత వేయాలి.. వచ్చే నెల 3న అన్ని విషయాలు చెబుతాం: ఎంపీ మార్గాని భరత్

నరసాపురం ఎంపీ రఘురామ కృష్ణరాజుపై రాజమండ్రి ఎంపీ మార్గాని భరత్ రామ్ ఫైర్ అయ్యారు. వైఎస్సార్సీపీ గుర్తుపై గెలిచి.. తెలుగుదేశం పార్టీకి వంత పాడుతున్నారని విమర్శించారు. ఏడాదిన్నర తర్వాత రఘురామకృష్ణరాజుపై అనర్హత పిటిషన్‌ను ప్రివిలేజ్‌ కమిటీకి పంపారని తెలిపారు. ఫిబ్రవరి 3వ తేదీన ప్రివిలేజ్‌ కమిటీ ఎదుట అన్ని విషయాలు వివరిస్తామని మార్గాని చెప్పారు. రఘురామ వ్యవహారాన్ని ఎథిక్స్‌ కమిటీకి సైతం పంపించాలన్నారు

రఘురామకృష్ణరాజుపై తక్షణమే అనర్హత వేటు వేయాలని మార్గాని డిమాండ్ చేశారు. 'రఘురామ సొంత పార్టీకి వ్యతిరేకంగా ఎలాంటి కార్యాకలాపాలు నిర్వహిస్తున్నారో ప్రజలు గమనిస్తున్నారు. ఆయన ఏ విధంగా పార్టీ వ్యతిరేక కార్యకలాపాలు చేశారో అందరికీ తెలుసు. ముఖ్యమంత్రి జగన్‌ మోహన్ రెడ్డిని ఎలా దూషించి మాట్లాడారో ఆధారాలు ఉన్నాయి. వీటిని ప్రివిలేజ్‌ కమిటీలో సమర్పిస్తాం..' అని ఎంపీ మార్గాని భరత్‌ తెలిపారు.

కాగా ఇటీవలె ఎంపీ రఘురామకృష్ణరాజు అనర్హత పిటిషన్‌‌పై వైఎస్సార్‌సీపీ ఇచ్చిన ఫిర్యాదుపై లోక్‌సభ స్పీకర్‌ విచారణకు ఆదేశించిన విషయం తెలిసిందే. ఈ మేరకు ప్రివిలేజ్‌ కమిటీ త్వరితగతిన విచారణ జరిపి ప్రాథమిక నివేదిక ఇవ్వాలని లోక్‌సభ స్పీకర్‌ ఆదేశించారు. ఫిబ్రవరి 3వ తేదీన ప్రివిలేజ్‌ కమిటీ సమావేశం కానుంది. సమావేశంలో ఈ అంశం చర్చకు వచ్చే అవకాశం ఉంది.

మరోవైపు ఫిబ్రవరి 5లోగా తనపై అనర్హత వేటు వేయించాలని ఎంపీ రఘురామ సైతం సవాల్ చేసిన సంగతి తెలిసిందే. నర్సాపురం ఉప ఎన్నికకు సిద్ధమని.. కచ్చితంగా ఏదో ఒక పార్టీలో చేరి పోటీ చేస్తానని క్లారిటీ ఇచ్చారు. అన్ని పార్టీల మద్దతును కూడగడతానని రఘురామ అంటున్నారు. అమరావతిని రాజధానిగా కొనసాగించేలానే ఎజెండాతోనే ఈ ఉప ఎన్నికలకు వెళతానంటున్నారు. జగన్ ప్రభుత్వ పతనం నర్సాపురం బై పోల్‌తోనే ప్రారంభమవ్వాలన్నారు. అటు వైఎస్సార్సీపీ ఎంపీలు.. ఇటు ఎంపీ రఘురామ సవాళ్లతో ఏం జరుగుతుందోనని ఆసక్తికరంగా మారింది.