పవన్ పార్టీ లక్ష్యంగా దుష్ప్రచారం.. సైబర్ క్రైం పోలీసుల చెంతకు..

గత కొంత కాలంగా తమపై దుష్పచారం జరుగుతోందని జనసేన ఆరోపిస్తోంది. పార్టీ ఏకైక ఎమ్మెల్యే రాపాక వరప్రసాద్‌కు జనసేన షోకాజ్ నోటీసులు ఇచ్చిందని.. దానికి ఆయన ఘాటుగా బదులిచ్చారని గతంలో ప్రచారం జరిగింది. తాజాగా ఆయన్ను పార్టీ నుంచి సస్పెండ్ చేశారని జనసేన పేరిట ఓ ఫేక్ ప్రెస్ నోట్ సోషల్ మీడియాలో వైరల్ అయ్యింది. ఈ విషయాన్ని సీరియస్‌గా తీసుకున్న జనసేన సైబర్ క్రైం పోలీసులకు ఫిర్యాదు చేయాలని నిర్ణయించింది.

పార్టీ లెటర్ హెడ్‌పై అధ్యక్షుడు పవన్ కళ్యాణ్, రాజకీయ కార్యదర్శి హరిప్రసాద్ పేరిట ఫేక్ నోట్స్ సర్క్యులేట్ చేస్తున్నారని.. పార్టీకి సంబంధించిన ప్రకటనలను అధికారిక గ్రూపుల ద్వారానే మీడియాకు పంపిస్తామని జనసేన స్పష్టం చేసింది.


అసెంబ్లీలో రాపాక వరప్రసాద్ జగన్ సర్కారు పట్ల సానుకూలంగా మాట్లాడుతున్నారు. దీంతో ఆయన వైయస్సార్సీపీలో చేరతారనే ఊహాగానాలు మొదలయ్యాయి. పవన్ కళ్యాణ్ కాకినాడలో చేపట్టిన రైతు సౌభాగ్య దీక్షకు రాపాక హాజరు కాలేదు. అసెంబ్లీ సమావేశాల కారణంగా ఈ కార్యక్రమానికి దూరంగా ఉంటున్నానని చెప్పారు. దీంతో పవన్ ఆయనకు షోకాజ్ నోటీసులు పంపారని ప్రచారం జరిగింది. దీనికి రాపాక ఘాటైన సమాధానం ఇచ్చారని.. వాట్సాప్‌లో ఫేక్ పోస్టు వైరల్ అయ్యింది. తాజాగా రాపాకను పవన్ కళ్యాణ్ పార్టీ నుంచి సస్పెండ్ చేశారని ఏకంగా జనసేన పేరిట ఫేక్ ప్రెస్ నోటు క్రియేట్ చేశారు.