YS Jagan కు రాయలసీమ నేతల లేఖ.. కృష్ణా జలాలకు చట్టబద్ధత కల్పించాల్సిందే..

గోదావరి జలాలను ఎత్తిపోతల పథకం ద్వారా కృష్ణా డెల్టాకు మళ్లించి అక్కడ మిగిలిన నీటిని రాయలసీమకు కేటాయించాలని కోరుతూ ఆంధ్రప్రదేశ్‌ ముఖ్యమంత్రి వైఎస్ జగన్మోహన్‌రెడ్డికి గ్రేటర్‌ రాయలసీమ నాయకులు శనివారం లేఖ రాశారు. మాజీ మంత్రి ఎంవీ మైసూరారెడ్డి, గంగుల ప్రతాప్‌రెడ్డి, ఉమ్మడి ఏపీ మాజీ డీజీపీలు దినేష్‌రెడ్డి, ఆంజనేయరెడ్డితో పాటు 16 మంది గ్రేటర్‌ రాయలసీమ నేతలు సీఎంకు లేఖ రాసిన వారిలో ఉన్నారు.

రాయలసీమకు గోదావరి జలాలు తీసుకోవాలని తెలంగాణ ముఖ్యమంత్రి కేసీఆర్‌ ప్రకటన చేయడం అభినందనీయమని రాయలసీమ నేతలు అన్నారు. ఈ ప్రకటనపై సీఎం జగన్‌ చొరవ తీసుకుని గ్రేటర్‌ రాయలసీమ ప్రాజెక్టులైన హంద్రీనీవా, గాలేరు- నగరి, వెలుగొండ ప్రాజెక్టులకు నీటి కేటాయింపులు చేసి చట్టబద్ధత కల్పించాలని డిమాండ్ చేశారు. బ్రిజేష్‌కుమార్‌ ట్రిబ్యునల్‌ తీర్పుపై సుప్రీం కోర్టులో వ్యాజ్యాలు అపరిష్కృతంగా ఉన్నాయని నాయకులు తెలిపారు. ఆ తీర్పు గ్రేటర్‌ రాయలసీమ మెడపై కత్తిలాంటిదన్నారు. తెలుగు గంగకు 25 టీఎంసీల నీటిని మాత్రమే కేటాయించారని, హంద్రీనీవా, గాలేరు- నగరి, వెలుగొండ ప్రాజెక్టులకు చుక్కనీరు కూడా కేటాయించలేదని ఆగ్రహం వ్యక్తం చేశారు. ఆ తీర్పు అమల్లోకి వస్తే ఈ ప్రాజెక్టులన్నీ నిరర్థక ఆస్తులుగా మిగిలిపోతాయిని ఆందోళన వ్యక్తం చేశారు.

ఆంధ్రప్రదేశ్‌ ముందున్న ప్రత్యా్మ్నాయం గోదావరి జలాలను మళ్లించడమేనని రాయలసీమ నేతలు అన్నారు. పట్టిసీమ, చింతలపూడి ప్రాజెక్టుల ద్వారా ఆదా అయిన నీటిని గ్రేటర్‌ రాయలసీమ ప్రాజెక్టులకు కేటాయించి చట్టబద్ధత కల్పించడం తప్ప మరో దారి లేదన్నారు. పట్టిసీమ ప్రాజెక్టు ద్వారా కృష్ణా డెల్టాకు గోదావరి జలాలు గత రెండేళ్లుగా తరలింపు జరుగుతోందన్న రాయలసీమ నేతలు.. ఆ మేరకు కృష్ణా జలాలు ఆదా అవుతున్న మాట వాస్తవమేనన్నారు. ఆదా అవుతున్న కృష్ణా నీటిని గ్రేటర్‌ రాయలసీమ ప్రాజెక్టులకు కేటాయించి.. శాసనసభలో చట్టబద్ధత కల్పించాలని ప్రభుత్వాన్ని డిమాండ్‌ చేశారు.