గంజాయి మత్తులో పోకిరీల హల్‌చల్.. మహిళలను అసభ్యకరంగా..

గంజాయి మత్తులో పోకిరీలు హల్‌చల్ చేయడంతో గ్రామస్థులు తగిన బుద్ధి చెప్పారు. రోడ్డు‌పై వెళ్తున్న పాదచారులను దూషించడం.. మహిళలను అసభ్యర మాటలతో వేధింపులకు పాల్పడడంతో దేహశుద్ధి చేసి పోలీసులకు సమాచారమిచ్చారు. గుంటూరు జిల్లాలో జరిగిన ఈ ఘటన వివరాలు..

తాడేపల్లి మండలం పాతూరులో ముగ్గురు పోకిరీలు హల్‌చల్ చేశారు. గంజాయి మత్తులో వీరంగం సృష్టించారు. రోడ్డుపై వెళ్తున్న గ్రామస్థులపై దాడికి పాల్పడ్డారు. రోడ్డుకి అడ్డంగా వాహనాలు నిలపి మహిళల పట్ల అసభ్యకర వ్యాఖ్యలు చేశారు. అదేంటని ప్రశ్నించేందుకు వచ్చిన గ్రామస్థులపైనా దాడికి దిగడంతో దేహశుద్ధి చేసి పోలీసులకు ఫిర్యాదు చేశారు.

Also Read: అనంతపురంలో హెచ్‌ఎం అరాచకం.. చిన్నారుల కాళ్లు, చేతులు కట్టేసి..

ఇటీవల గుంటూరు జిల్లాలోని మంగళగిరి, తాడేపల్లి ప్రాంతాలు గంజాయి, డ్రగ్స్, మత్తు పదార్థాలుగా కేరాఫ్ అడ్రస్‌గా మారాయి. కాలేజీ యువత లక్ష్యంగా మత్తు పదార్థాల విక్రయాలు జోరుగా జరుగుతున్నాయి. సమీప కళాశాలల విద్యార్థులు గంజాయి, డ్రగ్స్‌కి అలవాటు పడి పోకిరీలుగా తయారవుతున్నారు. మంగళగిరిలోని ఓ ప్రైవేటు జూనియర్ కళాశాల విద్యార్థులు మత్తు మందులు తీసుకుని అధ్యాపకుడిపై దాడికి పాల్పడిన సంచలనం కలిగించింది.

దానికి తోడు తరచూ పోలీసుల దాడుల్లో కేజీల కొద్దీ గంజాయి ప్యాకెట్లు బయటపడుతున్నాయి. విశాఖ ఏజెన్సీ ప్రాంతాల నుంచి గంజాయిని పెద్దఎత్తున తరలిస్తూ విద్యార్థులు దొరికిపోయిన సంఘటనలు అనేకం. ఏపీ సీఎం వైఎస్ జగన్.. ప్రతిపక్ష నేత చంద్రబాబు.. డీజీపీ కార్యాలయం అన్నీ తాడేపల్లి పరిధిలోనే ఉన్నాయి. హైసెక్యూరిటీ జోన్ అయినప్పటికీ విచ్చలవిడిగా మత్తు పదార్థాలు, గంజాయి విక్రయాలు జోరుగా జరుగుతుండడం గమనార్హం.

Read Also: అమరావతితో కేసీఆర్‌‌కి లింక్.. చంద్రబాబు సంచలన వ్యాఖ్యలు