AP vs TS: హరీష్ రావుకు ఎలాంటి సమస్యలున్నాయో నాకు తెలుసు: సజ్జల

AP vs TS: తెలంగాణ ఆర్థిక మంత్రి హరీష్ రావుపై.. ఏపీ ప్రభుత్వ సలహాదారు సజ్జల రామకృష్ణా రెడ్డి ఆగ్రహం వ్యక్తం చేశారు. తెలంగాణలోని సమస్యలు చూసుకోకుండా.. ఏపీపై కామెంట్ చేయడం సరైంది కాదని హితవు పలికారు. ఏపీలో టీచర్ల గురించి, వ్యవసాయ మోటార్లకు మీటర్ల గురించి మంత్రి హరీష్ రావు చేసిన వ్యాఖ్యలపై సజ్జల (Sajjala Rama Krishna Reddy) ఘాటుగా స్పందించారు. తమ రాష్ట్రంలో అన్ని పథకాలను పారదర్శకంగా అమలు చేస్తున్నామని స్పష్టం చేశారు. వేరే రాష్ట్రం గురించి తాము ఎప్పుడూ కామెంట్ చేయలేదని గుర్తుచేశారు. హరీష్ రావు ఎందుకు అలా మాట్లాడారో అర్ధం కావడం లేదన్న సజ్జల.. ఇది రెండు రాష్ట్రాల మధ్య అంశం కాదని స్పష్టం చేశారు. రెండు రాష్ట్రాల అంశంపై హరీష్ రావు (Harish Rao) మాట్లాడలేదన్నారు. హరీష్ రావుకు ఎందుకు ఆవేశం వచ్చిందో తెలియదని సెటైర్లు వేశారు. సీఎం జగన్‌ను విమర్శించి రెచ్చగొట్టాలని చూస్తున్నట్టుగా కన్పిస్తుందని అనుమానించారు. ఓ గ్యాంగ్ ఏమంటుందో.. దాన్నే వాళ్లంటున్నారని సజ్జల రామకృష్ణారెడ్డి (Sajjala Rama Krishna Reddy) ఆగ్రహం వ్యక్తం చేశారు. ఆ గ్యాంగ్‌తో జతకట్టి హరీష్ రావు మాట్లాడినట్టుగా అనిపిస్తుందన్నారు.

టీఆర్ఎస్ (TRS) పార్టీగా తమపై విమర్శలు చేయలేదన్న సజ్జల.. హరీష్ రావుకు వ్యక్తిగత సమస్యలున్నాయో తెలియదని వ్యంగ్యంగా వ్యాఖ్యానించారు. తాము ఏనాడూ తెలంగాణపై విమర్శలు చేయలేదని గుర్తు చేశారు. ఏ రాష్ట్రం సమస్యలను వారు చూసుకుంటే మంచిదని హితవు పలికారు. తమకు ఏపీ (Andhra Pradesh) రాష్ట్ర ప్రయోజనాలే ముఖ్యమని స్పష్టం చేశారు. ఏ ఫ్రంట్‌లోనూ తాము చేరబోమని కుండబద్ధలు కొట్టారు.

కేసీఆర్‌తో గొడవలు ఉంటే అక్కడ చూసుకోవాలి..
ఏపీ ఐటీ మంత్రి గుడివాడ అమర్నాథ్ (Gudivada Amarnath) కూడా హరీష్ రావు వ్యాఖ్యలపై ఆగ్రహం వ్యక్తం చేశారు. కేసీఆర్‌తో హరీష్ రావుకు గొడవలు ఉంటే అక్కడ చూసుకోవాలని వ్యాఖ్యానించారు. కేసీఆర్‌ను చూసి నేర్చుకోవాల్సిన అవసరం మాకు లేదని స్పష్టం చేశారు. తెలంగాణ ఏర్పడిన ఎనిమిదేళ్లలో ఏం చేశారో.. మూడేళ్లలో తాము ఏం చేశామో ఒక్కసారి పోల్చుకోవాలని సూచించారు. మరోసారి ఏపీ (AP) గురించి మాట్లాడితే ఊరుకోబోమని స్పష్టం చేశారు. ఎవరి పని వాళ్లు చూసుకుంటే మంచిదని హితవు పలికారు.
Also Read: