కల్కి భగవాన్ కేసులో ట్విస్ట్.. వైసీపీ ఎమ్మెల్యే ఎంట్రీ

కల్కి భగవాన్ ఆశ్రమంపై ఐటీ అధికారుల సోదాల్లో వేల కోట్ల అక్రమాస్తులు వెలుగుచూసిన విషయం తెలిసిందే. ఐటీ దాడుల్లో చిత్తూరు జిల్లా వరదయ్యపాళెం, తమిళనాడులోని పలు ప్రాంతాల్లో వేల ఎకరాల భూములు ఉన్నట్లు అధికారులు గుర్తించారు. ఇప్పటికే వంద కోట్ల వరకూ నగదును ఐటీ అధికారులు సీజ్ చేశారు. ఏపీ, తమిళనాడు సహా ఆఫ్రికా దేశాల్లోనూ భారీగా ఆస్తులున్నట్లు అధికారులు గుర్తించారు.

తమిళనాడుకు చెందిన ఎల్‌ఐసీ ఏజెంట్ విజయ్‌కుమార్ నెల్లూరు జిల్లా సంగంకి చెందిన పద్మావతిని వివాహం చేసుకున్నారు. ఆ తర్వాత కొద్దికాలానికే ఆధ్యాత్మిక గురువు అవతారం ఎత్తారు. వరదయ్యపాళెంలో ఆశ్రమం స్థాపించారు. ఈ ఆశ్రమం వందల గదులతో ఫైవ్‌స్టార్ హోటల్‌ను తలపించేలా ఉండడం, అక్కడికి విదేశీ భక్తులు కూడా ఎక్కువగా వస్తుండడం చర్చనీయాంశమైంది.

Also Read: గన్నవరం టీడీపీ ఎమ్మెల్యే వంశీపై కేసు..

కల్కి భగవాన్ ఆశ్రమం, ఆస్తులపై ఐటీ దాడులు ఆసక్తికరంగా మారాయి. ఇప్పుడే ఎందుకు దాడులు చేశారనే విషయమై పలు వాదనలు వినిపిస్తున్నాయి. దీని వెనుక రాజకీయ కారణలేమైనా ఉన్నాయా? లేక ఎవరైనా ఉప్పందించారా? అన్న సందేహాలు వ్యక్తమవుతున్నాయి. కల్కి ఆశ్రమం నుంచి పెద్దఎత్తున నగదు విదేశాలకు తరలిపోతోందన్న ఆరోపణలు రావడంతోనే ఐటీ అధికారులు దాడులు చేశారన్న ప్రచారమూ లేకపోలేదు.

అయితే కల్కి భగవాన్ అక్రమాస్తుల కేసులో ట్విస్ట్ చోటుచేసుకుంది. కల్కి భగవాన్ అక్రమాస్తులపై ఐటీ సోదాలు జరుగుతున్న సమయంలో సత్యవేడు వైఎస్సార్సీపీ ఎమ్మెల్యే కోనేటి ఆదిమూలం చేసిన వ్యాఖ్యలు ప్రాధాన్యం సంతరించుకున్నాయి. కల్కి భగవాన్ అక్రమాస్తులపై సిట్టింగ్ జడ్జితో విచారణ జరిపించాలని ఆదిమూలం డిమాండ్‌ చేశారు.

Read Also: చంద్రబాబు ఓకే చెబితే అధిష్టానంతో మాట్లాడతా.. బీజేపీ ఎంపీ సంచలన వ్యాఖ్యలు

అజ్ఞాతంలో ఉన్న కల్కి ఆశ్రమం వ్యవస్థాపకుడు విజయ కుమార్‌, పద్మావతిని కస్టడీలోకి తీసుకోవాలని ఎమ్మెల్యే ఆదిమూలం అన్నారు. ఆశ్రమ భూములను ప్రభుత్వం స్వాధీనం చేసుకుని పేదలకు పంచి పెట్టాలన్నారు. విజయ్ కుమార్ బినామీలను గుర్తించి వాస్తవాలు వెలుగులోకి తీసుకురావాలని కోరారు.