నన్నే రమ్మని పిలుస్తారా?. సీఎం ముఖ్యకార్యదర్శి ప్రవీణ్ ప్రకాశ్‌పై నిమ్మగడ్డ ఆగ్రహం

రాష్ట్ర ఎన్నికల కమిషనర్, జగన్ ప్రభుత్వ మధ్య కొనసాగుతున్న ప్రచ్ఛన్న యుద్ధం మరో మలుపు తిరిగింది. త్వరలో జరగబోయే ఉప ఎన్నికలు, స్థానికసంస్థల ఎన్నికలపై చర్చించేందుకు అక్టోబరు 26న క్యాంపు ఆఫీసులో సీఎం ముఖ్య కార్యదర్శి నిర్వహిస్తున్న సమావేశానికి తనను హాజరుకావాలని లేఖ పంపినట్టు ఎస్ఈసీ నిమ్మగడ్డ రమేశ్ కుమార్ ఆరోపించారు. దీనిపై ఆగ్రహం వ్యక్తం చేసిన ఆయన ఘాటుగా సమాధానం పంపినట్టు విశ్వసనీయ వర్గాలు తెలిపాయి. ఎన్నికలకు సంబంధించి నిర్వహించే ఏ సమావేశాలకూ తన అనుమతి లేకుండా వెళ్లవద్దంటూ ఎస్ఈసీ కార్యదర్శిని ఆయన ఆదేశించడం అధికార వర్గాల్లో చర్చనీయాంశమైంది.

స్థానిక సంస్థల ఎన్నికల నిర్వహణపై చర్చించేందుకు వివిధ రాజకీయ పార్టీల ప్రతినిధులతో అక్టోబరు 28న ఒక సమావేశం నిర్వహించాలని నిమ్మగడ్డ నిర్ణయించారు. అయితే, సీఎం ముఖ్య కార్యదర్శి ప్రవీణ్‌ ప్రకాష్‌ వ్యక్తిగత కార్యదర్శి నుంచి రమేశ్‌కుమార్‌ ఆఫీసుకు శనివారం ఒక లేఖ వెళ్లింది. అక్టోబరు 26న ప్రవీణ్‌ ప్రకాష్‌ నిర్వహించే సమావేశానికి హాజరుకావాలని అందులో పేర్కొన్నారు. ఈ విషయాన్ని రమేశ్‌కుమార్‌ వ్యక్తిగత కార్యదర్శికి క్యాంప్ ఆఫీసు సిబ్బంది ఫోన్‌ చేసి కూడా చెప్పినట్టు తెలుస్తోంది.

దీనిపై తీవ్రంగా స్పందించిన రమేశ్‌కుమార్‌ తన వ్యక్తిగత కార్యదర్శి ద్వారా, ప్రవీణ్‌ ప్రకాష్‌ కార్యాలయానికి ఒక లేఖ పంపినట్టు ఎన్నికల కమిషన్‌ వర్గాలు పేర్కొన్నాయి. హైకోర్టు జడ్జితో సమానహోదా గల పదవిలో ఉన్న ఎన్నికల కమిషనర్‌కి.. తన కంటే జూనియర్ సమావేశానికి హాజరవ్వాలని హుకుం జారీ చేయడం తీవ్ర అభ్యంతరకరమని, అది బెదిరింపు ధోరణిలా ఉందని నిమ్మగడ్డ ఘాటుగా లేఖ రాసినట్టు సమాచారం. అయితే, ఈ సమాచారం ఎన్నికల సంఘం కార్యదర్శి వాణీమోహన్‌కి పంపించాలన్నది తమ ఉద్దేశమని, పొరపాటున ఎన్నికల కమిషనర్‌కు వెళ్లిందని ప్రవీణ్‌ ప్రకాష్‌ కార్యాలయం చెప్పినట్టు సమాచారం.