దసరాకి ట్రైన్ రిజర్వేషన్ దొరకలేదా? అయినా ఏం పర్లేదు!

దసరా పండుగ సందర్భంగా హైదరాబాద్-విజయవాడ మధ్య రైళ్లన్నీ రద్దీగా ఉంటాయి.. ఊరెళ్లడానికి రిజర్వేషన్ చేసుకుందామంటే ఇప్పటికే వెయిటింగ్ లిస్ట్ చాంతాడంత ఉందని బాధపడుతున్నారా? మరేం పర్లేదు.. దసరాకు ఏపీకి వెళ్లే ప్రయాణికులను దృష్టిలో ఉంచుకుని దక్షిణ మధ్య రైల్వే శుభవార్త చెప్పింది. దసరా పండుగ పూర్తయ్యే వరకు సికింద్రాబాద్ నుంచి విజయవాడ, విజయవాడ నుంచి సికింద్రాబాద్‌కు గుంటూరు మీదుగా ప్రత్యేక రైళ్లను నడుపుతున్నట్లు పేర్కొంది.

విశేషమేంటంటే.. ఈ రైళ్లలో రిజర్వేషన్ సమస్య అంతగా ఉండదు. ఎందుకంటే దసరా దృష్ట్యా ప్రత్యేకంగా నడుపుతున్న రైళ్లు కావడంతో ఎక్కువ సంఖ్యలో జనరల్ భోగీలనే ఏర్పాటు చేశారు. ఈ రైళ్లలో 14 జనరల్‌ బోగీ లుంటాయి. ఈ రైళ్లు ప్రతిరోజూ సికింద్రాబాద్‌ నుంచి విజయవాడకు రాకపోకలు సాగించనున్నాయి. దసరా పండుగ తర్వాత రెండు రోజుల వరకు ఈ రైళ్లు నడుస్తాయి. ప్రత్యేక రైలు సర్వీసులు 10వ తేదీ వరకు అందుబాటులో ఉంటాయని రైల్వే అధికారులు తెలిపారు. రెగ్యులర్‌, ప్రత్యేక రైళ్లలో టిక్కెట్లు బుక్ చేసుకోలేకపోయినవారు ఈ జన సాధారణ రైళ్ల సేవలను వినియోగించుకోవాలన్నారు.

Also Read: వైఎస్సార్సీపీ బాటలో టీడీపీ.. వర్కౌటవుద్దా?

ట్రైన్ నంబర్.07192 సికింద్రాబాద్‌- విజయవాడ జనసాధారణ రైలు ఈ నెల 2వ తేదీ నుంచి 10వ తేదీ వరకు నిత్యం మధ్యాహ్నం 12 గంటలకు బయలుదేరి నల్లగొండ, మిర్యాలగూడ, నడికుడి, పిడుగురాళ్ల, సత్తెనపల్లి మీదుగా సాయంత్రం 5.20కి గుంటూరు, మంగళగిరి, రాత్రి 7 గంటలకు విజయవాడ చేరుకుంటుంది. నంబర్.07193 విజయవాడ-హైదరాబాద్ జనసాధారణ రైలు ఈ నెల 2 నుంచి 10వ తేదీ వరకు రాత్రి 8.15 గంటలకు బయలుదేరి మంగళగిరి, 9.15కి గుంటూరు, సత్తెనపల్లి, పిడుగురాళ్ల, నడికుడి మీదుగా సికింద్రాబాద్‌, వేకువజామునకు 3 గంటలకు హైదరాబాద్‌ చేరుతుంది.