సిక్కోలు జవాన్ వీర మరణం.. 9 నెలల క్రితం పెళ్లి, ఇంతలో విషాదం

శ్రీకాకుళం జిల్లాకు వజ్రపుకొత్తూరుకు చెందిన అసోం రైఫిల్స్‌ జవాను బొంగు బాబూరావు వీరమరణం తీవ్ర విషాదాన్ని నింపింది. అరుణాచల్‌ప్రదేశ్‌లోని ఖోన్సా సరిహద్దు సమీపంలో ఉగ్రవాదులతో జరిగిన ఎదురుకాల్పుల్లో బాబూరావు మరణించినట్లు అధికారులు తెలిపారు. గురువారం మధ్యాహ్నం 1.40 గంటలకు జవాను భౌతికకాయం విశాఖపట్నం విమానాశ్రయానికి చేరుకుంది. కాశీబుగ్గ దరి తాళభద్ర నుంచి అక్కుపల్లి మీదుగా ర్యాలీతో స్వగ్రామానికి తీసుకొచ్చారు.

బాబూరావుకు ఈ ఏడాది ఫిబ్రవరిలోనే వివాహమైంది. గత నెల చివర్లో విధుల్లోకి వెళ్లి, 21 రోజులు క్వారంటైన్‌లో ఉన్నారు. తిరిగి విధుల్లో చేరిన మూడు రోజులకే అమరుడయ్యారు. పెళ్లైన తొమ్మిది నెలలకే భర్త ఇలా చనిపోవడంతో భార్య కన్నీళ్లు పెట్టుకుంది. ఆ కుటుంబం తీవ్ర శోకసంద్రంలో మునిగిపోయింది.. స్థానికంగా తీవ్ర విషాదాన్ని నింపింది. శుక్రవారం ఉదయం అభిమానులు, స్థానికుల అశ్రునయనాల నడుమ సైనిక లాంఛనాలతో బాబూరావు అంత్యక్రియలు నిర్వహించారు.