టీడీపీకి సుప్రీంకోర్టు షాక్.. మూడు వారాలు డెడ్‌లైన్

గుంటూరు జిల్లా మంగళగిరిలో టీడీపీ కార్యాలయానికి భూ కేటాయింపుల వ్యవహారంపై సుప్రీంకోర్టులో విచారణ జరిగింది. వైఎస్సార్‌సీపీ ఎమ్మెల్యే ఆళ్ల రామకృష్ణారెడ్డి దాఖలు చేసిన పిటిషన్‌పై మంగళవారం జస్టిస్‌ నారిమన్‌ ధర్మాసనం విచారణ చేపట్టింది. పర్యావరణ నిబంధనలు ఉల్లంఘించి జరిపిన భూ కేటాయింపులను రద్దు చేయాలని పిటిషనర్‌ కోరారు. ఆర్కే తరపున న్యాయవాదులు ప్రశాంత్ భూషణ్, రమేష్ వాదనలు వినిపించారు. టీడీపీ, ఏపీ ప్రభుత్వం, సీఆర్‌డీఏకు సుప్రీంకోర్టు నోటీసులు జారీ చేసింది. మూడు వారాల్లోగా సమాధానం ఇవ్వాలని ఆదేశించింది. తదుపరి విచారణను సుప్రీంకోర్టు మూడు వారాల తర్వాత చేపట్టనుంది.

గుంటూరు జిల్లా మంగళగిరి సమీపంలో ఆత్మకూరు పరిధిలోని సర్వే నంబర్ 392లో ఉన్న 3.65 ఎకరాల వాగు పోరంబోకు భూమిని టీడీపీ కార్యాలయ నిర్మాణానికి 99 సంవత్సరాల పాటు లీజుకిస్తూ గత ప్రభుత్వం 2017లో జీవో జారీ చేసిందని ఎమ్మెల్యే ఆర్కే అన్నారు. అది నిబంధనలకు విరుద్ధమని ఏపీ హైకోర్టులో ప్రజాప్రయోజన వ్యాజ్యం దాఖలు చేశారు. పర్యావరణ చట్టాల ప్రకారం.. వాగులు, వంకలు, చెరువులు, నదీ పరివాహక ప్రాంతాల భూములను నిర్మాణాలకు కేటాయించడం చట్ట విరుద్ధమని ఆళ్ల పిటిషన్‌లో పేర్కొన్నారు. అదే విషయాన్ని గతంలో సుప్రీంకోర్టు స్పష్టం చేసిందని ఆళ్ల తరఫు న్యాయవాది పేర్కొన్నారు. కానీ కోర్టు పిటిషన్‌ను కొట్టేసింది. దీంతో ఆయన సుప్రీంకోర్టును ఆశ్రయించారు.