మహిళా ఉద్యోగితో SVBC Chairman పృథ్వీ రొమాంటిక్ సంభాషణ, సోషల్ మీడియాలో వైరల్!

ఎస్వీబీసీ ఛైర్మన్ పృథ్వీ ఓ వివాదంలో చిక్కుకున్నారు. ఓ మహిళా ఉద్యోగినితో ఆయన రొమాంటిక్‌గా మాట్లాడిన ఆడియో టేప్‌ను 99 టీవీ బయటపెట్టింది. 99 టీవీ బయటపెట్టిన ఆ ఆడియో టేప్ ప్రకారం.. అన్నం తినేటప్పుడు నేను నీకు గుర్తు రాలేదా..? అని పృథ్వీ ఆ మహిళతో వ్యాఖ్యానించారు. తాను మార్చి వరకు మద్యం తాగనన్న పృథ్వీ.. డ్రింక్ చేయడం మొదలుపెడితే.. నీ దగ్గర కూర్చొని మొదలుపెడతానన్నారు. నువ్వు గుండెల్లో ఉన్నావ్ అని పృథ్వీ అనగా... ఆ మాట మీరు భలే చెప్తారు సార్ అని ఆ మహిళ బదులిచ్చింది. కామెడీలు చేయకు.. నిజంగా చెబుతున్నాను.. వెనుక నుంచి వచ్చి నిన్ను గట్టిగా పట్టుకుందామని అనుకున్నాను. కానీ కెవ్వుమని అరుస్తామని ఆగిపోయానని పృథ్వీ మాట్లాడుతున్నట్టుగా ఆ ఆడియో టేప్‌‌లో ఉంది. నువ్వంటే నాకిష్టం లవ్ యూ అన్న మాటలు కూడా అందులో వినొచ్చు.

టీటీడీకి అనుబంధంగా ఉండే ఎస్వీబీసీ ఛానల్‌కు ఎంతో ప్రాధాన్యం ఉంది. శ్రీ వేంకటేశ్వరుడికి సేవ చేయడానికి ఉపయోగపడే పవిత్రమైన పదవిలో ఉండి పృథ్వీ నిజంగా ఇలా వ్యాఖ్యానించారా? అనే అనుమానాలు తలెత్తుతున్నాయి. వారిద్దరి మధ్య జరిగిన సంభాషణ ఏ రోజు జరిగిందో కూడా తెలియడం లేదు. ఒకవేళ ఈ ఆడియో టేప్ నిజమని తేలితే మాత్రం ఆయనపై వేటు పడే అవకాశాలున్నాయి. నిజానిజాలు తెలియకపోయినప్పటికీ.. సోషల్ మీడియాలోనూ ఈ ఆడియో టేప్ వైరల్‌గా మారింది.

అమరావతిలో ఆందోళనలు చేపట్టిన రైతులను పృథ్వీ ఇటీవల పెయిడ్ ఆర్టిస్టులతో పోల్చడం వివాదాస్పదమైంది. వైసీపీ నేత, సీనియర్ నటుడైన పోసాని కూడా పృథ్వీ తీరును తప్పుబట్టారు. అమరావతి విషయమై నిర్మాత అశ్వనీదత్.. మూడు రాజధానుల విషయంలో పృథ్వీ చేసిన వ్యాఖ్యలను ఖండించారు. పృథ్వీ కమెడియన్ అని , ఆయన మాటలకు విలువ ఇవ్వాల్సిన అవసరం లేదన్నారు. పృథ్వీని రాజకీయంగా టార్గెట్ చేయడానికే ఈ ఆడియో టేప్ బయటపెట్టారా? లేదా కావాలనే బురదజల్లుతున్నారా? అనే అనుమానాలు కూడా తలెత్తుతున్నాయి.