భార్యకు అనుమానం.. భర్త మనస్థాపం.. పెళ్లైన రెండునెలలకే..!

అనుమానం.. భార్యాభర్తల మధ్య చిచ్చుపెట్టింది. రెండు ప్రాణాలు గాల్లో కలిసేలా చేసింది. భర్త వేరే అమ్మాయితో మాట్లాడుతున్నాడన్న అనుమానంతో వివాహిత ఆత్మహత్య చేసుకుంది. ఆత్మహత్యకు భర్తే కారణమని ఆమె తల్లిదండ్రులు పోలీస్ స్టేషన్‌లో ఫిర్యాదు చేయడంతో మనస్థాపం చెందిన భర్త మరుసటి రోజే ఆత్మహత్య చేసుకుని తనువు చాలించిన విషాదకర సంఘటన ఏపీ, తమిళనాడు సరిహద్దు అయిన తడలో చోటుచేసుకుంది.

తమిళనాడు, ఏపీ సరిహద్దు గ్రామమైన ఎళావూరుకి చెందిన అరసు అన్బు(27)కి సమీప గ్రామానికి చెందిన లోకేశ్వరితో రెండు నెలల క్రితం వివాహమైంది. కొద్దిరోజులకే అన్బు మరో అమ్మాయితో సన్నిహితంగా ఉండడం చూసి నిలదీసింది. భర్తపై అనుమానం పెంచుకుని మనస్థాపానికి గురైన లోకేశ్వరి ఉరివేసుకుని ఆత్మహత్యకు పాల్పడింది. కుమార్తె మరణంతో ఆగ్రహం చెందిన లోకేశ్వరి కుటుంబ సభ్యులు అన్బు, అతని కుటుంబ సభ్యులపై ఆరంబాకం పోలీస్ స్టేషన్‌లో ఫిర్యాదు చేశారు.

Also Read: గుంటూరు జిల్లాలో అమానుషం.. యువకుడిపై పెట్రోల్ పోసి..

పోలీసు కేసుతో మనస్థాపం చెందిన అన్బు.. తడలో ఉన్న తన స్నేహితుడి వద్దకు వచ్చాడు. తనకు సాయం చేయాలని కోరినట్లు తెలుస్తోంది. స్నేహితుడి సాయంతో తడలోనే ఓ ప్రైవేటు లాడ్డిలో రూమ్ అద్దెకు తీసుకున్నాడు. లాడ్డికి వచ్చిన మరో ఇద్దరు స్నేహితులతో మాట్లాడాడు. అనంతరం తనకు భోజనం తీసుకురావాలని అడగడంతో స్నేహితులు భోజనం తెచ్చేందుకు వెళ్లారు.

Read Also: వేల ఎకరాలు.. కోట్ల కొద్దీ నోట్ల కట్టలు.. ఐటీ సోదాల్లో కళ్లు చెదిరే నిజాలు..

పోలీసులు కేసుతో అప్పటికే తీవ్ర మనస్థాపం చెందిన అన్బు తలుపులు వేసుకుని లాడ్డి గదిలోనే ఉరివేసుకుని ఆత్మహత్యకు యత్నించాడు. కాసేపటికి గదికి వచ్చిన స్నేహితులు తలుపులు పగలకొట్టి లోపలికి ప్రవేశించి అన్బును కిందకి దించారు. వెంటనే సమీపంలోని శ్రీసిటీ ఆస్పత్రికి తరలించగా చికిత్స పొందుతూ ప్రాణాలు విడిచాడు. పెళ్లై ముచ్చటగా మూణ్నెళ్లు కూడా కాకముందే నవదంపతులు ఆత్మహత్యలకు పాల్పడడం స్థానికులను తీవ్రంగా కలచివేసింది.