జగన్‌ను కలిసిన ఎమ్మెల్యే మద్దాలి గిరికి టీడీపీ షాక్

టీడీపీకి గుంటూరు పశ్చిమ ఎమ్మెల్యే మద్దాలి గిరిధర్ ఝలక్ ఇచ్చిన సంగతి తెలిసిందే. ముఖ్యమంత్రి వైఎస్ జగన్‌మోహన్‌రెడ్డితో సమావేశమైన గిరిధర్.. వైఎస్సార్‌సీపీకి జై కొట్టారు. టీడీపీ అధినేత చంద్రబాబుతో పాటూ నేతలపై విరుచుకుపడ్డారు. ఇంగ్లీష్ మీడియం, రాజధాని విషయంలో బాబు రెండు పడవలపై కాళ్లు పెట్టారని.. దీనిపై ఆత్మ విమర్శ చేసుకోవాలని వ్యాఖ్యలు చేశారు. మద్దాలి గిరి జగన్‌కు జైకొట్టారో లేదో.. టీడీపీ వేగంగా పావులు కదిపింది. నష్ట నివారణ చర్యలు చేపట్టింది.

Read Also: న్యూ ఇయర్ వేడుకలకు టీడీపీ దూరం.. చంద్రబాబు ట్వీట్

ఎమ్మెల్యే గిరికి షాకిస్తూ.. పశ్చిమ టీడీపీ ఇన్‌చార్జ్‌గా కోవెలమూడి రవీంద్రను అధినేత చంద్రబాబు నియమించారు. నియోజకవర్గ బాధ్యతల్ని రవీంద్రకు అప్పగించారు. ఆయన గుంటూరు పశ్చిమం నుంచి గతంలోనే టికెట్ ఆశించారు. సామాజిక, స్థానిక రాజకీయ సమీకరణాలను దృష్టిలో పెట్టుకొని 2014, 2019లో టికెట్‌ దక్కలేదు. కానీ పార్టీ కోసం రవీంద్ర పనిచేశారు.. పార్టీలోనూ కీలకంగా వ్యవహరిస్తున్నారు. తాజాగా గిరి వైఎస్సార్‌సీపీవైపు అడుగులు వేయడంతో ఈయనకు అవకాశం దక్కింది.

కోవెలమూడి రవీంద్ర నియోజకవర్గ పార్టీ నేతలతో సమావేశమయ్యేందుకు సిద్ధమయ్యారు. టీడీపీ నుంచి కేడర్ బయటకు వెళ్లకుండా నష్ట నివారణ చర్యలు ప్రారంభించారు. చంద్రబాబు కూడా అదే దిశగా ఆలస్యం చేయకుండా నియోజకవర్గ ఇంఛార్జ్‌ను నియమించారు.