ఆ ఇద్దరు వైసీపీ ఎమ్మెల్యేల వల్లే కరోనా వ్యాపించింది: చంద్రబాబు

ఇద్దరు వైఎస్సార్‌‌సీపీ ఎమ్మెల్యేల వల్లే రెండు జిల్లాల్లో కరోనా వ్యాపించిందని సంచలన వ్యాఖ్యలు చేశారు టీడీపీ అధినేత చంద్రబాబు. చిత్తూరు జిల్లా శ్రీకాళహస్తిలో ఎమ్మెల్యే ట్రాక్టర్లు, మనుషుల్ని పెట్టి పోలీసులు, అధికారులతో ఊరేగింపు చేశారని.. ఆరోజు ర్యాలీలో పాల్గొన్న అధికారుల్లో 18 మందికి కరోనా పాజిటివ్‌ వచ్చింది అన్నారు. ఈ ఘటనకు బాధ్యులు ఎవరు అని ప్రశ్నించారు. ప్రభుత్వం దీనిపై సమాధానం చెప్పాల్సిన బాధ్యతు ఉందన్నారు. ఇక గుంటూరులో కరోనా ప్రబలడానికి ఓ ఎమ్మెల్యే కారణమయ్యారన్నారు చంద్రబాబు.

ఇక ఎంపీ విజయసాయిరెడ్డి ఊరంతా తిరుగుతున్నారని టీడీపీ అధినేత ఆరోపించారు. బెంగళూరు నుంచి వచ్చిన ఎమ్మెల్యేను మదనపల్లిలో పోలీసులు అడ్డుకున్నారు. మరో ఎమ్మెల్యే కాళ్లపై పూలు చల్లించుకుంటున్నారు అంటూ మండిపడ్డారు. మరోవైపు తమిళనాడులో పాజిటివ్‌ కేసులు ప్రబలుతున్నా.. అక్కడి నుంచి జస్టిన్‌ కనగరాజ్‌ను తీసుకొచ్చి ఎన్నికల కమిషనర్‌గా చేశారని చంద్రబాబు మండిపడ్డారు. ఆయన్ను అక్కడ నుంచి తీసుకురావాలా.. ఆంధ్రప్రదేశ్‌లో ఎవరూ లేరా అని మండిపడ్డారు.

ప్రజాప్రతినిధులు కొందరు ఇంటింటికీ తిరిగి కరోనా వ్యాపింపజేస్తున్నారని.. వీళ్లంతా ప్రజల పాణాలతో ఆడుకుంటుంటే మేం సహకరించాలా అంటూ చంద్రబాబు ప్రశ్నించారు. ఇక బయటకు రావడానికి వీల్లేదని తమను బెదిరిస్తున్నారన్నారు. కరోనా బారి నుంచి ప్రాణాలు ఎలా కాపాడుకోవాలని ప్రజలంతా ఆలోచిస్తుంటే.. జగన్ సర్కార్ మాత్రం రాజధాని తరలింపు, స్థానిక సంస్థల ఎన్నికలే ముఖ్యమయ్యాయి అన్నారు. పరిస్థితి ఇలాగే కొనసాగితే లాక్‌డౌన్‌ ముగిసేనాటికి రాష్ట్రంలో కేసుల సంఖ్య 40వేలకు చేరే అవకాశం ఉంది అన్నారు. వెంటనే అఖిలపక్ష సమావేశం ఏర్పాటు చేయాలన్నారు.