ఎన్టీఆర్ హెల్త్ వర్సిటీ పేరు మార్పుపై గవర్నర్‌కు చంద్రబాబు ఫిర్యాదు!

విజయవాడలో ఎన్టీఆర్ హెల్త్ యూనివర్సిటీ పేరు మార్పును తెలుగు దేశం పార్టీ సీరియస్‌గా తీసుకుంది. టీడీపీ అధికారంలోకి రాగానే యూనివర్సిటీకి మళ్లీ ఎన్టీఆర్ పేరు పెడతామని టీడీపీ అధినేత చంద్రబాబునాయుడు, ఆయన కుమారుడు నారా లోకేష్ వెల్లడించారు. ఈ క్రమంలోనే ఈ విషయంపై రాష్ట్ర గవర్నర్‌ బిశ్వభూషణ్‌ హరిచందన్‌‌కు చంద్రబాబు ఫిర్యాదు చేశారు.

ఈ మేరకు రాష్ట్ర గవర్నర్‌ బిశ్వభూషణ్‌ హరిచందన్‌తో తెలుగు దేశం పార్టీ అధినేత చంద్రబాబునాయుడు గురువారం భేటీ అయ్యారు. రాజ్‌భవన్‌లో గవర్నర్‌ను ఆయన కలిశారు. విజయవాడలోని ఎన్టీఆర్‌ హెల్త్‌ యూనివర్సిటీ పేరు మార్పుపై గవర్నర్ బిశ్వభూషణ్‌కు చంద్రబాబు ఫిర్యాదు చేశారు. టీడీపీ నేతలతో కలిసి విజయవాడలోని రాజ్‌భవన్‌కు వెళ్లిన చంద్రబాబు.. రాష్ట్ర ప్రభుత్వ నిర్ణయంపై అభ్యంతరం వ్యక్తం చేస్తూ ఫిర్యాదు అందజేశారు.

ఎన్టీఆర్ హెల్త్ యూనివర్సిటీ పేరును వైఎస్సార్‌ ఆరోగ్య విశ్వవిద్యాలయంగా మార్పు చేస్తూ రాష్ట్ర ప్రభుత్వం నిర్ణయం తీసుకున్న విషయం తెలిసిందే. పేరు మార్పునకు సంబంధించిన బిల్లును ఏపీ శాసనసభలో ప్రవేశపెట్టి ఆమోదించారు. ఈ నేపథ్యంలో గవర్నర్‌ను చంద్రబాబు కలిసి ఫిర్యాదు చేశారు.