బాలకృష్ణ చిన్నల్లుడికి జగన్ సర్కార్ భారీ షాక్.. భరత్‌కు అండగా చంద్రబాబు!

నందమూరి బాలకృష్ణ చిన్నల్లుడు శ్రీ భరత్‌కు విశాఖపట్నం మున్సిపల్ అధికారులు షాకిచ్చారు. విశాఖ గీతం యూనివర్సిటీ గోడల్ని, గీతం వర్సిటీ ప్రధాన ద్వారాన్ని, ప్రహరీ గోడ కొంతభాగం, సెక్యూరిటీ రూములను జీవీఎంసీ సిబ్బంది కూల్చివేశారు. రుషికొండ, ఎండాడ పరిధిలో 40.51 ఎకరాల్లో అక్రమ నిర్మాణాలు చేపట్టారనే ఆరోపణలతో అధికారులు బుల్డోజర్లతో పడగొట్టారు. ఈ వ్యవహారంలో భరత్‌కు తెలుగు దేశం పార్టీ అధినేత, ప్రతిపక్ష నాయకుడు చంద్రబాబునాయుడు అండగా నిలిచారు. జగన్ సర్కారుపై పదునైన విమర్శలతో విరుచుకుపడ్డారు.

కట్టడం చేతకాని వాళ్లకు కూల్చే హక్కులేదని చంద్రబాబు అన్నారు. గీతం వర్సిటీలో కూల్చివేతలను ఆయన తీవ్రంగా తప్పుబట్టారు. ఉత్తరాంధ్రకు గర్వకారణమైన గీతం సంస్థలపై రాజకీయ కక్ష సాధింపు మరో తుగ్లక్‌ చర్య అని ఆయన మండిపడ్డారు. కరోనా కాలంలో సామాజిక బాధ్యతగా రూ. కోట్ల నష్టాన్ని భరించి 2,590 మంది కోవిడ్‌ బాధితులకు గీతం వైద్య సంస్థ చికిత్స అందించిందని చంద్రబాబు పేర్కొన్నారు. అలాంటి ఆదర్శవంతమైన సరస్వతి నిలయాన్ని అర్ధరాత్రి 200 మందితో వెళ్లి కూల్చడం దారుణమని అన్నారు.

ఇప్పటికే చదువు, ఉపాధి, ఆరోగ్య చికిత్సల కోసం ఏపీ ప్రజలు పక్క రాష్ట్రాలకు పోతున్నారని చంద్రబాబు అన్నారు. మొన్న మాజీ ఎంపీ సబ్బం హరి ఇంటిపై, నేడు గీతం వర్సిటీలో విధ్వంసం వైసీపీ కక్ష సాధింపు రాజకీయాలకు ప్రత్యక్ష సాక్ష్యమని ఆరోపించారు. వ్యక్తులు, పార్టీపై అక్కసుతో వైసీపీ పాల్పడుతున్న కక్షసాధింపు చర్యలను తీవ్రంగా వ్యతిరేకిస్తున్నామన్నారు. ఇప్పటికే కొన్ని సంస్థలు ఏపీకి రావాలంటే భయపడే దుస్థితి ఏర్పడిందన్నారు.