TDP: ఆ 19మందికి మాత్రమే టికెట్లు, ఆ ప్రకటనతో సంబంధం లేదన్న టీడీపీ.. నేతలపై చంద్రబాబు సీరియస్

టీడీపీ (TDP) అధినేత చంద్రబాబు (Chandrababu Naidu) దూకుడు పెంచారు. రాష్ట్రవ్యాప్తంగా నియోజకవర్గాల ఇంఛార్జ్‌లతో వరుసగా సమీక్షలు చేస్తున్నారు. నేతల పనితీరుపై రివ్యూ చేస్తున్నారు.. పనితీరుపై ఆరా తీస్తున్నారు. ఇంటర్నల్ రిపోర్ట్స్ ఆధారంగా బాగా పనిచేస్తున్న నియోజకవర్గ ఇంచార్జ్‌లను చంద్రబాబు అభినందిస్తున్నారు. సమర్థవంతంగా లేని వారిని మీరు ఎన్నికలు సిద్దంగా ఉన్నారా.. ప్రత్యామ్నాయం చూసుకోమంటారా అంటూ ప్రశ్నిస్తున్నారు. సభ్యత్వ కార్యక్రమం నుంచి బాదుడే బాదుడు వరకు అన్ని అంశాలపై సమీక్ష చేస్తున్నారు. నేతల పనితీరుపై తన దగ్గర ఉన్న సమాచారాన్ని సమీక్షల సమయంలో బయటకు తీసి సమీక్ష చేస్తున్నారు.సమగ్రమైన, లోతైన నివేదికలతో నేతలను చంద్రబాబు ప్రశ్నిస్తున్నారు. పార్టీ కార్యక్రమాల నిర్వహణతో పాటు స్థానిక సమస్యలపై, ప్రత్యర్థి నేతలపై పోరాటాల విషయంలో కూడా ఇంఛార్జ్‌లతో సమీక్ష చేస్తున్నారు. పార్టీ కార్యక్రమాల్లో యాక్టివ్ గాలేని వారు పనితీరు మార్చుకోవాలని సూచిస్తున్నారు. ఇంఛార్జ్‌గా ఉన్నవారు నియోజకవర్గంలో అందరినీ కలుపుకుని వెళ్లాలని.. ఏకపక్షంగా ఉంటే ఉపేక్షించేది లేదని సీరియస్ వార్నింగ్ ఇచ్చారు. గతంలో ఏ ప్రభుత్వంపై లేనంత వ్యతిరేకత జగన్ ప్రభుత్వంపై ఉందని.. అలా అని ఇంట్లో కూర్చుంటామంటే కుదరదని నేతలకు చంద్రబాబు తేల్చి చెబుతున్నారు.

ఇంఛార్జ్‌లు, నేతల్లో సీరియస్‌నెస్ పెరగాలని.. పార్టీ కార్యక్రమాల్లో ఇంకా చురుగ్గా పనిచేయాలని సూచించారు. ప్రభుత్వం, స్థానిక ప్రజాప్రతినిధుల అవినీతి, వైఫల్యాలపై బలంగా పోరాడాలన్నారు. ప్రజలకు అందుబాటులో ఉంటూ.. ప్రతి ప్రజా సమస్యపైనా పనిచేయాలి అన్నారు. తనకు నేతల పనితీరే ప్రామాణికమని.. గెలుస్తారన్న నమ్మకం కలిగిస్తే టికెట్‌ ఇస్తాను అన్నారు. లేని పక్షంలో పునరాలోచన చేయాల్సి వస్తుంది అన్నారు.

చంద్రబాబు సమీక్షల్లో టికెట్ల ఖరారు అంశమే చర్చకు రావడం లేదని.. కానీ కొందరు తమకు అనుకూలంగా నిర్ణయం జరిగిపోయిందని ప్రచారం చేసుకుంటున్నారని ఆగ్రహం వ్యక్తం చేశారు. దీనిపై టీడీపీ అధిష్ఠానం సీరియస్‌గా తీసుకుంది. సిట్టింగ్ ఎమ్మెల్యేల విషయంలో మాత్రమే చంద్రబాబు అధికారిక నిర్ణయం ప్రకటించారని పార్టీ వర్గాలు అంటున్నాయి. ఇంఛార్జ్‌ల విషయంలో అటువంటి ప్రకటన ఏదీ చేయలేదని.. వారి పనితీరు బాగుంటే వారికే టికెట్‌ వస్తుంది. బాగోకపోతే రాదు అంటున్నారు.

ఆశించిన స్ధాయిలో పనితీరు చూపించలేకపోతున్న నేతలపై ఆగ్రహం వ్యక్తం చేశారు. కింది స్థాయిలో వర్గ విభేదాలు, స్ధానిక సమస్యలపై పోరాటాలు, ప్రత్యర్థి నేతల తప్పులను ఎత్తిచూపడం వంటి అనేక అంశాలను ప్రస్తావిస్తున్నారు. ఈ సమీక్షలను నేతలు అంతా సీరియస్‌గా తీసుకుని పనితీరు మెరుగుపరుచుకోవాలని.. అంతిమంగా పనితీరే ప్రామాణికం అని గుర్తుపెట్టుకోవాలని సూచిస్తున్నారు. గత నెలలో ప్రారంభమైన ఈ సమీక్షలలో ఇప్పటివరకు 59 నియోజకవర్గాల్లో ముఖాముఖీ భేటీలు ముగిశాయి. తాజాగా రాజమండ్రి సిటీ, పెద్దాపురం, రాజాం నియోజవర్గాల ఇంఛార్జ్‌లు ఆదిరెడ్డి భవాని, చినరాజప్ప, కొండ్రు మురళిలతో సమీక్ష చేశారు.