YS Jagan సర్కారు కూలిపోయే చాన్స్.. ఎన్నికలకు రెడీగా ఉండండి.. చంద్రబాబు సంచలనం

తెలుగు దేశం పార్టీ అధినేత, ఏపీ ప్రతిపక్ష నాయకుడు చంద్రబాబునాయుడు మరో సంచలనానికి తెరతీశారు. ఆంధ్రప్రదేశ్‌లో త్వరలోనే ఎన్నికలు రావడం ఖాయమని వ్యాఖ్యానించారు. ఏ క్షణంలో ఎన్నికలు వచ్చినా ఎదుర్కోవడానికి సిద్ధంగా ఉండాలని తెలుగు దేశం పార్టీ శ్రేణులకు పిలుపునిచ్చారు. ఈ మేరకు శనివారం చంద్రబాబు మీడియాతో మాట్లాడుతూ.. జగన్ సర్కారుపై తనదైన శైలిలో విరుచుకుపడ్డారు. గంటకు రూ.9 కోట్లు అప్పు చేస్తూ సీఎం జగన్ రాష్ట్రాన్ని అప్పుల్లోకి నెట్టేస్తున్నారని విమర్శించారు. త్వరలోనే రాష్ట్రంలో ఎన్నికలు రావడం ఖాయమని, ఏ క్షణంలో ఎన్నికలు వచ్చిన ఎదుర్కోవడానికి సిద్ధంగా ఉండాలని పిలుపిచ్చారు.

అలాగే ఉచిత విద్యుత్‌ రైతులు పోరాడి సాధించుకున్న హక్కని.. ఉచిత విద్యుత్‌ను యథాతథంగా పునరుద్ధరించాలని చంద్రబాబు డిమాండ్‌ చేశారు. రాష్ట్ర ప్రభుత్వం నిర్ణయాలు రైతుల పాలిట గుదిబండలా మారాయని విమర్శించారు. వ్యవసాయ విద్యుత్తుకు నగదు బదిలీ పథకం పేరిట మీటర్లు బిగిస్తున్నారని, వ్యవసాయ మోటార్లకు మీటర్ల బిగింపు రైతుల ప్రాణాలు తీయడమేనని వ్యాఖ్యానించారు. రాష్ట్ర ప్రభుత్వం తక్షణమే జీవో 22 ఉపసంహరించుకోవాలని డిమాండ్ చేశారు.

ప్రభుత్వ నిర్ణయం రాయలసీమ, మెట్టప్రాంత రైతుల మనోభావాలు దెబ్బతీస్తోందని చంద్రబాబు విమర్శించారు. వైసీపీ ప్రభుత్వ నయవంచన రోజుకొకటి బయటపడుతోందని ధ్వజమెత్తారు. ప్రజలపై ప్రతి గంటకు రూ.9 కోట్ల అప్పు మోపుతున్నారని విమర్శించారు. రాష్ట్రమేమీ జగన్‌ బానిస కాదని స్పష్టం చేశారు.

కాగా, ఏపీలో త్వరలో ఎన్నికలు రాబోతున్నాయని చంద్రబాబు చేసిన వ్యాఖ్యలు ప్రస్తుతం రాష్ట్రంలో చర్చనీయాంశమయ్యాయి. చంద్రబాబు వ్యాఖ్యలతో మాజీ ఎంపీ సబ్బంహరి కూడా ఏకీభవించారు. కేంద్ర ప్రభుత్వం త్వరలోనే జమిలి ఎన్నికలకు వెళ్లాలని భావిస్తోందని, కరోనా పరిస్థితులు తలెత్తకుండా ఉంటే ఇప్పటికే ఆ ప్రక్రియ మొదలయ్యేదని వ్యాఖ్యానించారు. ముఖ్యమంత్రి జగన్ రాష్ట్రంలో పులి అని, ఢిల్లీ పిల్లి అని వ్యాఖ్యానించారు. కేంద్ర ప్రభుత్వం జమిలి ఎన్నికల నిర్ణయానికి ఏపీ, తెలంగాణ సీఎంలు జగన్, కేసీఆర్ అంగీకరించారని చెప్పారు.