కాపురం చేయాలన్నా జే ట్యాక్స్ కట్టాలేమో! జగన్ సర్కార్‌పై చంద్రబాబు హాట్‌కామెంట్స్

ఉపాధి హామీ నిధులు రూ.2,500 కోట్లు విడుదల చేయకుండా జగన్ సర్కార్ ఉద్దేశపూర్వకంగా ఆలస్యం చేస్తోందని టీడీపీ అధినేత చంద్రబాబు నాయుడు విమర్శించారు. కేంద్ర ప్రభుత్వం నిధులు మంజూరు చేసినా రాష్ట్రప్రభుత్వం కావాలనే అడ్డుకుంటోందని ఆరోపించారు. దొంగ లెక్కలు రాయడంలో ఆరితేరిన సీఎం జగన్‌ అడ్డంగా దొరికిపోయాడంటూ ఘాటు విమర్శలు చేశారు.

గుంటూరు టీడీపీ కార్యాలయంలో మాజీ సర్పంచ్‌లు, ఎంపీటీసీ, జెడ్పీటీసీలతో చంద్రబాబు సమావేశం నిర్వహించారు. గ్రామాల్లో ఉపాధి పనులకు బిల్లులు రాక కూలీలు ఇబ్బందులు పడుతున్నారని చంద్రబాబు దృష్టికి తీసుకొచ్చారు. టీడీపీ హయాంలో చేపట్టిన ఉపాధి పనులపై చేసిన ఆరోపణలను నిరూపించలేకపోయారని చంద్రబాబు అన్నారు. సీఎం జగన్ సొంత నియోజకవర్గం పులివెందుల, పంచాయతీ రాజ్ శాఖ మంత్రి పెద్దిరెడ్డి రామచంద్రారెడ్డి నియోజకవర్గం చిత్తూరు జిల్లా పుంగనూరు మినహా ఉపాధి నిధులు మరెక్కడా చెల్లించడం లేదని చంద్రబాబు దుయ్యబట్టారు.

Also Read: ఏ1 జగన్.. ఏ2 అవంతి.. టీడీపీ నేత ఘాటు విమర్శలు

తన ఒక కన్ను పోయినా పర్లేదు.. ఎదుటివారి రెండు కళ్లు పోవాలన్నదే జగన్‌ మనస్తత్వమని తీవ్ర వ్యాఖ్యలు చేశారు. సొంత పార్టీ నేతలను కూడా ఇబ్బందులకు గురవుతున్నారని, అతనొక్కడు తప్ప ఇంకెవరూ బాగుపడకూడదనే తత్వం జగన్‌ది అని చంద్రబాబు మండిపడ్డారు. తన సొంత పొలంలో మట్టి తీసుకుపోవాలన్నా జగన్‌మోహన్‌రెడ్డి ట్యాక్స్(జె ట్యాక్స్) వసూలు చేస్తున్నారని ఆరోపించారు. రేపు భార్యాభర్తలు కాపురం చేయాలన్నా జె ట్యాక్స్ వసూలు చేస్తారేమోనంటూ చంద్రబాబు సెటైర్లు పేల్చారు.

టీడీపీ నేతల ఆర్ధిక మూలలను దెబ్బతీయాలని చూస్తున్నారని ఆరోపించారు. ఫీల్డ్‌లో పనులు చేసిన వారికి కేటాయించిన నిధులను నేరుగా కూలీలకు చెల్లించాలన్నారు. కేంద్రం పంపిన ఎఫ్‌పీవోలను అడ్డుకోవడానికి రాష్ట్ర ప్రభుత్వానికి అధికారం లేదన్నారు. తక్షణమే బిల్లులు చెల్లించాలని చంద్రబాబు డిమాండ్ చేశారు. ఒకవేళ ఈ ప్రభుత్వం దిగిరాకుంటే.. ఈ సారి తమ ప్రభుత్వమే వస్తుందని.. బిల్లులను వడ్డీతో సహా చెల్లిస్తామని భరోసా ఇచ్చారు.