విజయవాడ టీడీపీ మేయర్ అభ్యర్థిగా శ్వేత.. ఓహ్ టీడీపీ ఎంపీ జోష్‌కు కారణం ఇదా!

ఏపీలో స్థానిక సంస్థల ఎన్నికల హడావిడి కనిపిస్తోంది. జెడ్పీటీసీ, ఎంపీటీసీ, పంచాయతీతో పాటూ మున్సిపల్ ఎన్నికలకు నగారా మోగడంతో పార్టీలన్నీ బిజీ అయ్యాయి. ఎన్నికల్లో గెలుపు లక్ష్యంగా వ్యూహాలకు పదును పెడుతున్నాయి.. బలమైన అభ్యర్థుల్ని రంగంలోకి దించేందుకు సిద్ధమయ్యాయి. నామినేషన్లకు ఎక్కువ సమయం లేకపోవడంతో అభ్యర్థుల ఎంపికపై కసరత్తు మొదలు పెట్టారు. ఇటు మున్సిపల్ ఎన్నికలకు నేటి నుంచి నామినేషన్ల స్వీకరణ మొదలుకానుంది.

Read Also: కడప జిల్లాలో చంద్రబాబుకు మరో షాక్.. జగన్ సమక్షంలో వైసీపీలోకి

ఇదిలా ఉంటే కీలకమైన విజయవాడ కార్పొరేషన్‌ విషయంలో టీడీపీ కీలక నిర్ణయం తీసుకున్నట్లు తెలుస్తోంది. మేయర్ అభ్యర్థి ఎవరో తేల్చేసింది. ఈసారి మేయర్ అభ్యర్థిగా కేశినేని శ్వేతను రంగంలోకి దించాలని నిర్ణయం తీసుకున్నట్లు సమాచారం.. ఆమె పేరును ఫైనల్ చేసినట్లు టీడీపీ వర్గాలు చెబుతున్నాయి.. ఇవాళో, రేపో శ్వేత పేరును అధికారికంగా ప్రకటించే అవకాశం ఉంది.

Also Read: అర్ధరాత్రి నడిరోడ్డుపై పడుకున్న టీడీపీ ఎమ్మెల్యే

శ్వేత విజయవాడ ఎంపీ కేశినేని నాని రెండో కుమార్తె. ఆమె గత రెండు పార్లమెంట్ ఎన్నికల్లో కేశినేని నాని తరుపున విస్తృతంగా ప్రచారం చేశారు. అంతేకాదు ఆమె యూఎస్ ఎన్నికల్లో హిల్లరీ క్లింటన్ తరుపున అక్కడ ప్రచార కార్యక్రమాల్లో చురుకుగా పాల్గొన్నారు. ఆమె విద్యావంతురాలు కూడా కావడంతో చంద్రబాబు శ్వేతను అభ్యర్థిగా బరిలోకి దించితే బావుంటుందని భావించారట. విజయవాడ పార్టీ నేతలతో చర్చించి ఈ మేరకు నిర్ణయం తీసుకున్నట్లు తెలుస్తోంది.

ఎంపీ కేశినేని నాని కూడా విజయవాడ మేయర్ పీఠాన్ని కచ్చితంగా టీడీపీ కైవసం చేసుకుంటుందని ధీమా వ్యక్తం చేశారు. మేయర్‌తో పాటూ జెడ్పీని కైవసం చేసుకుంటామన్నారు. వైఎస్సార్‌సీపీ ప్రభుత్వ పాలనపై ప్రజల్లో అసంతృప్తి ఉందని.. జగన్ పతనం విజయవాడ నుంచి మొదలవుతుందన్నారు కేశినేని నాని. ఇప్పుడు ఆయన కుమార్తెను మేయర్ అభ్యర్థిగా ప్రకటించడంతో ఫుల్ జోష్‌లో ఉన్నారు.