అమ్మఒడిపై వాలంటీర్ల ఆసక్తికర వ్యాఖ్యలు.. టీడీపీకి ఆయుధంగా సాక్షి వీడియోలు

అధికారంలోకి వచ్చిన 9 నెలల్లోనే జగన్ సర్కార్ ప్రతిష్టాత్మకంగా సంక్షేమ పథకాలను అమలు చేస్తోంది. అమ్మఒడి, నేతన్న నేస్తం, రైతు భరోసా, పింఛన్ పెంపు, కొత్త రేషన్ కార్డులు అందిస్తోంది. అంతేకాదు పింఛన్లు నేరుగా ఇంటికి తీసుకెళ్లి అందించేలా వినూత్న కార్యక్రమానికి శ్రీకారం చుట్టింది. ఈ పథకాల అమలు, అర్హుల గుర్తింపు బాధ్యతల్ని ప్రభుత్వం వాలంటీర్లకు అప్పగించిన సంగతి తెలిసిందే. అయితే పథకాల అమలుపై ఇటీవల వాలంటీర్లు చేసిన వ్యాఖ్యల వీడియోలు సోషల్ మీడియాలో వైరల్ అవుతున్నాయి. సాక్షి వీడియోను తెలుగు తమ్ముళ్లు ఆయుధంగా చేసుకున్నారు.

అసలు విషయానికి వస్తే.. గ్రామ వాలంటీర్లతో సాక్షి మీడియా విజయవాడలో చర్చా కార్యక్రమం చేపట్టింది. కొంతమంది వాలంటీర్లు కూడా ఈ చర్చకు హాజరయ్యారు. గ్రామాల్లో ఎదురవుతున్న సమస్యలపై కొందరు వాలంటీర్లు మాట్లాడారు.. అమ్మఒడి పథకం కొందరు డబ్బున్నవాళ్లకు అందుతోందని ఓ వాలంటీర్ వ్యాఖ్యానించారు. ఈ పథకం 50శాతం డబ్బు ఉన్నవాళ్లకే అందిందని.. చాలామంది పేదలు అనర్హత జాబితాలో ఉన్నారని చెప్పుకొచ్చారు. కరెంట్ బిల్, ఐటీ రిటర్న్స్, భూములు ఉన్నాయనే నిబంధనలతో ఇబ్బందులు ఎదురవుతున్నాయని సమస్యను వివరించే ప్రయత్నం చేశారు.
విజయవాడ సమీపంలోని గన్నవరం మండలం ముస్తాబాద్‌ నుంచి వచ్చిన ప్రవీణ్ కూడా మరికొన్ని సమస్యల్ని చెప్పుకొచ్చారు. ప్రభుత్వం తీసుకొచ్చిన నిబంధనలతో కొంతమంది అర్హులకు పథకాలు అందడం లేదన్నాడు. ఓ కుటుంబంలో తండ్రికొడులకు ఉన్నప్పుడు.. ఫ్యామిలీ మొత్తం ఐదారుగురు ఉంటారని.. ఒక కరెంట్ మీటర్ ఉంటుంది.. కరెంట్ ఎక్కువ వాడతారు.. దీంతో వారికి 300 యూనిట్లు దాటి అవకాశం ఉందని చెప్పుకొచ్చాడు. దీంతో వారికి పింఛన్, అమ్మఒడి, రేషన్ కార్డులు ఆగిపోయాయన్నారు
ఈ రెండు వీడియోలను టీడీపీ ఆయుధంగా చేసుకుంది. గ్రామాల్లో అర్హులైన వారికి పథకాలు చేరడం లేదని ఆరోపిస్తున్నారు. వీడియోలను సోషల్ మీడియాలో వైరల్ చేస్తున్నారు. ముఖ్యమంత్రి జగన్‌ ఇలాంటి ఇబ్బందుల్ని గమనించాలని.. నిబంధనల విషయంలో కొన్ని మార్పులు చేయాలనే డిమాండ్‌ను వినిపిస్తున్నారు.