'చంద్రబాబు చాలా భయస్తుడు.. కమ్మవాళ్లకు అన్యాయం జరిగింది'

టీడీపీకి కుల ముద్ర వేయడం సరికాదంటున్నారు టీడీపీ సీనియర్ నేత గోరంట్ల బుచ్చయ్య చౌదరి. కమ్మ కులం పేరుతో పార్టీపై తప్పుడు ప్రచారం చేసే ప్రయత్నం జరుగుతోందన్నారు. మొదటి నుంచి సామాజిక న్యాయం పాటిస్తున్న ఏకైక పార్టీ తెలుగు దేశం మాత్రమే అంటున్నారు. ఓ యూట్యూబ్ ఛానల్‌కు ఇచ్చిన ఇంటర్వ్యూలో బుచ్చయ్య అధినేత చంద్రబాబుపై ఆసక్తికర విషయాలు చెప్పుకొచ్చారు.

టీడీపికి కుల ముద్ర వేయడం సరికాదన్నారు బుచ్చయ్య. తానే ప్రత్యక్ష ఉదాహరణనని.. సీనియర్‌గా ఉన్న తనకు ఎలాంటి పదవి రాలేదని పరోక్షంగా గుర్తు చేశారు. చంద్రబాబు చాలా భయస్తులు.. పక్కన ఇద్దరు కమ్మవాళ్లు ఉంటే వద్దు ఇంకెవరినైనా తెచ్చి పెట్టమంటుంటారని ఆసక్తికర వ్యాఖ్యలు చేశారు. ఆయన హయాంలో పోస్టింగులు గమనించినా ఇదే విషయం అర్థమవుతుందన్నారు. బాబు సొంత కులానికి ఏం చేశారని ప్రశ్నించిన గోరంట్ల.. వాస్తవానికి చెప్పాలంటే కులానికి అన్యాయం జరిగిందన్నారు.

ఇప్పుడు కొత్త ప్రభుత్వం వచ్చాక.. ముఖ్యమంత్రి జగన్‌మోహన్‌రెడ్డి ఒకే కులానికి న్యాయం చేస్తున్నారని బుచ్చయ్య చౌదరి చెప్పారు. కమ్మ ఆఫీసర్లను పక్కన పెట్టారని.. డీఎస్పీ, సీఐలను వీఆర్‌కు పంపారని విమర్శించారు. ఇక బీసీకి కాకుండా పయ్యావుల కేశవ్‌కు పీఏసీ పదవి ఎందుకు ఇచ్చారనే విమర్శలపైనా స్పందించారు. వైఎస్సార్‌సీపీ ప్రతిక్షంలో ఉన్న సమయంలో రెడ్డి సామాజిక వర్గానికి చెందిన బుగ్గనకు పీఏసీ ఛైర్మన్ పదవి ఇస్తే ఎందుకు మాట్లాడలేదని గోరంట్ల ప్రశ్నించారు.

టీడీపీ చేసినట్లు సామాజిక న్యాయం ఎవరు చేయలేదన్నారు బుచ్చయ్య. ఇప్పుడు జగన్ ఒక్క కేబినెట్ తప్పితే అన్నిచోట్ల ఒకే సామాజిక వర్గానికి పదవులు ఇస్తున్నారని ఆరోపించారు. టీడీపీ హయాంలో కమ్మ కులంలో ఎంతమందికి అవకాశాలు ఇచ్చారో చెప్పాలన్నారు. చంద్రబాబు రెడ్లకు నాలుగు మంత్రి పదవులు ఇచ్చారని.. మిగిలిన ఉత్తరాంధ్ర, సీమ, కోస్తాలో సామాజిక న్యాయం చేశారన్నారు. తెలుగు దేశం పార్టీకి అనవసరంగా కుల ముద్ర వేయడం సరికాదని.. కులానికి ఏమీ జరగలేదన్నారు. ఎన్నికల సమయంలో కష్టపడతారు.. పార్టీని గెలిపించుకుంటారని.. తర్వాత ఏం జరుగుతుందో అందరికి తెలుసన్నారు.