Jagan స్కామ్ స్టార్.. సీక్రెట్‌గా చిత్రీకరించిన వైసీపీ బాగోతం: లోకేశ్ సంచలన ఆరోపణలు

ఏపీ సర్కారు ప్రతిష్టాత్మకంగా చేపట్టిన గ్రామవాలంటీర్ల నియామకం పట్ల టీడీపీ నేత నారా లోకేశ్ సెటైర్లు వేశారు. సీఎం జగన్‌ను స్కామ్ స్టార్‌గా అభివర్ణించారు. గ్రామ వాలంటీర్ల స్కామ్‌తో జగన్ రూ.12 వేల కోట్ల ప్రజాధనం దోపిడీకి తెరలేపారని లోకేశ్ ఆరోపించారు. ‘‘రాజకీయాలకు అతీతంగా గ్రామ వాలంటీర్ల నియామకం అని జగన్ గారు ఆస్కార్ రేంజిలో నటిస్తుంటే, కడుపులో దాచుకోలేక వైకాపా స్కామ్‌ని దొంగలెక్కల వీరుడు బయటకి కక్కేశార’’ని విజయసాయి రెడ్డి మాట్లాడుతున్న వీడియోను లోకేశ్ ట్వీట్ చేశారు.

వాలంటీర్ల స్కీమ్ అనేది భారీ కుట్ర అని లోకేశ్ ఆరోపించారు. వాలంటీర్ల ఉద్యోగాలన్నీ వైఎస్ఆర్సీపీ కార్యకర్తలకే అప్పగించారని లోకేశ్ విమర్శించారు. దీనికి రుజువుగా వైఎస్ఆర్సీపీ సోషల్ మీడియా విభాగం సమావేశంలో ఎంపీ విజయసాయి మాట్లాడిన వీడియోను లోకేశ్ షేర్ చేశారు.
వాలంటీర్ల నియామకంలో కులం, మతం చూడలేదు వైకాపా కార్యకర్తా? కాదా? అని మాత్రమే చూసాం అని స్వయంగా ప్రకటిస్తున్నారని లోకేశ్ విమర్శించారు. నాలుగు లక్షల మంది వైకాపా నిరుద్యోగులకు ఉద్యోగాలు ఇచ్చుకోవడానికి 10 లక్షల మంది ఉద్యోగాలు తీసేసి వారి పొట్ట కొట్టే భారీ కుట్రే వైకాపా వాలంటీర్ల స్కీమ్ అని టీడీపీ యువ నేత ఆరోపణలు గుప్పించారు.