మా జీవితాల్లో వెలుగులు నీ వల్లే.. నారా లోకేష్ ఎమోషనల్!

తెలుగు దేశం పార్టీ జాతీయ ప్రధాన కార్యదర్శి నారా లోకేష్ ముద్దుల తనయుడు నారా దేవాన్ష్ పుట్టిన రోజును నారా, నందమూరి కుటుంబాలు ఘనంగా జరుపుకుంటున్నాయి. ఈ సందర్భంగా కొడుకు బర్త్ డే‌ని పురస్కరించుకుని లోకేష్ ట్విటర్ వేదిక శుభాకాంక్షలు తెలిపారు. దేవాన్ష్ పుట్టిన నాటి నుంచి తమ జీవితాలను వెలుగులమయం చేశాడని ఉద్వేగభరిత వ్యాఖ్యలు చేశారు. ‘‘నువ్వు పుట్టిన రోజు నుంచి మా జీవితాల్లో వెలుగులు నింపావు. నీకు వయసు వేగంగా పెరుగుతున్నా.. నాము మాత్రం ఎప్పటికీ నా చిట్టికొడుకువే. మా జీవితాల్లో సంతోషాలను విరజిమ్ముతున్నందుకు థాంక్స్. పుట్టిన రోజు శుభాకాంక్షలు నారా దేవాన్ష్’’ అని లోకేష్ ఉద్వేగభరితంగా ట్వీట్ చేశారు.
కాగా, మనవడు దేవాన్ష్‌ పుట్టినరోజు కావడంతో తెలుగు దేశం పార్టీ అధినేత చంద్రబాబునాయుడు కుటుంబ సమేతంగా తిరుమలకు చేరుకుని శ్రీవారిని దర్శించుకున్నారు. అనంతరం శ్రీవారి అన్నదానం ట్రస్టుకు ఏకంగా రూ. 30 లక్షలు విరాళంగా అందజేశారు. తిరుమలలోనే దేవాన్ష్ పుట్టిన రోజును ఘనంగా నిర్వహించేందుకు ఏర్పాట్లు చేశారు. నారా లోకేష్- బ్రాహ్మణిల తనయుడు దేవాన్ష్ పుట్టిన రోజు వేడుకలను గత నాలుగేళ్లగా తిరుమల శ్రీవారి సన్నిధిలో నిర్వహిస్తున్నారు.

ఆదివారం ఉదయం స్వామివారి ఆలయానికి చేరుకున్న చంద్రబాబుకు అధికారులు స్వాగతం పలికారు. చంద్రబాబు, ఆయన సతీమణి భువనేశ్వరి, తనయుడు లోకేష్, ఆయన సతీమణి బ్రాహ్మణి, తనయుడు దేవాన్ష్‌లు, సినీ నటుడు, ఎమ్మెల్యే బాలకృష్ణ, ఆయన సతీమణి వసుంధర, ఇతర కుటుంబ సభ్యులు శ్రీవారి సేవలో పాల్గొన్నారు. దేవాన్ష్ పుట్టినరోజు సందర్భంగా తిరుమలలో ఒకరోజు అన్న ప్రసాదం వితరణకు అయ్యే ఖర్చును చంద్రబాబు కుటుంబం భరిస్తుంది.