ప్రశ్నాపత్రం లీకేజీ: ఆ లీకువీరుడు జగన్ గారే! లోకేష్ ఘాటు విమర్శలు

ప్రభుత్వం ప్రతిష్టాత్మకంగా నిర్వహించిన గ్రామ, వార్డు సచివాలయ పరీక్షల ప్రశ్నాపత్రాలు లీకయ్యాయని వార్తలు రావడంతో రాజకీయ దుమారం రేగిన సంగతి తెలిసిందే. ఈ వ్యవహారంపై టీడీపీ జాతీయ ప్రధాన కార్యదర్శి నారా లోకేష్ మరోసారి సంచలన ఆరోపణలు చేశారు. అసలు సచివాలయ ఉద్యోగాలకు పరీక్షలు నిర్వహించింది ఎవరని నిలదీశారు. గ్రామ సచివాలయ ఉద్యోగాల పరీక్షల స్కామ్‌కి తల్లి, తండ్రి ఎవరని ప్రశ్నించారు.

ఒకవైపు ఈ స్కామ్‌తో తమకి సంబంధం లేదని, పరీక్ష తాము నిర్వహించలేదని ఏపీపీఎస్సీ చెబుతోంది. మరోవైపు పరీక్ష నిర్వహించింది ఏపీపీఎస్సీనే అని మంత్రులు అంటున్నారు. ఇంతకీ పరీక్ష పెట్టింది ఎవరు? అంటూ లోకేష్ ప్రశ్నించారు. సచివాలయ ఉద్యోగాల పేరుతో 18 లక్షల మంది యువత భవిష్యత్తుతో ఆటలు ఆడుతున్నారా అంటూ ఆగ్రహం వ్యక్తం చేశారు.

Must Read: టీడీపీ మాజీ ఎమ్మెల్యేకు ముందస్తు బెయిల్.. ఇకనైనా అజ్ఞాతం వీడతారా?


అయితే పరీక్షలు నిర్వహించింది ఎవరనేది స్పష్టంగా తెలియకపోయినా ఉద్యోగాల స్కామ్‌కి తండ్రి మాత్రం సీఎం వైఎస్ జగనేనని తెలిసిపోయిందని లోకేష్ విమర్శించారు. చిన్నప్పుడే పేపర్లు లీక్ చేసిన లీకు వీరుడంటూ ఘాటు వ్యాఖ్యలు చేశారు. అంత చిన్న వయస్సులోనే లీకులు చేశారు.. కదా ఇప్పుడేమంత కష్టమేం కాదులే అంటూ ఎద్దేవా చేశారు.

Also Read: ‘ఈనాడు’పై సీఎంవో సీరియస్.. విషయమేంటంటే?

సచివాలయ ఉద్యోగాల వ్యవహారంతో తమకేమీ సంబంధం లేదని ఏపీపీఎస్సీ చైర్మన్ ఉదయ్ భాస్కర్ స్పష్టం చేయడంతో వివాదం ముదురుతోంది. ప్రభుత్వ శాఖలే పరీక్షలు నిర్వహించాయని, లీక్ వ్యవహారం తమకు తెలియదని ఏపీపీఎస్సీ తెలిపింది. పరీక్షలు ఎవరు నిర్వహించారని అడిగితే ఒకరిపై ఒకరు చెప్పుకోవడమేంటని టీడీపీ ప్రశ్నిస్తోంది. ప్రభుత్వ పెద్దల సహకారంతోనే సచివాలయ ఉద్యోగాల స్కామ్ జరిగిందని ఆరోపిస్తోంది.