Janasena Long March‌కి గంటా దూరం.. బాబు ఆదేశాలు బేఖాతరు.. కారణం ఇదేనా?

జనసేన పార్టీ విశాఖపట్నంలో నిర్వహించిన లాంగ్ మార్చ్‌లో ఉత్తరాంధ్రకు చెందిన టీడీపీ నేతలు పాల్గొన్నారు. లాంగ్ మార్చ్‌ కోసం పవన్ కళ్యాణ్ స్వయంగా చంద్రబాబు నాయుడికి ఫోన్ చేసి మాట్లాడారు. దీంతో ఉత్తరాంధ్ర ప్రాంతానికి చెందిన టీడీపీ నేతలు అయ్యన్న, అచ్చెన్న, గంటా శ్రీనివాస రావు పాల్గొనాలని బాబు ఆదేశించారు. జనసేన లాంగ్ మార్చ్‌లో అయ్యన్నపాత్రుడు, అచ్చెన్నాయుడు పాల్గొనగా.. పవన్ సామాజికవర్గానికే చెందిన గంటా శ్రీనివాస రావు మాత్రం డుమ్మా కొట్టారు.

ఇందుకు కారణాలు అధికారికంగా తెలియరాలేదు కానీ.. చంద్రబాబు ఆదేశాలను గంటా బేఖాతరు చేయడం చర్చనీయాంశమైంది. మెగాస్టార్‌కి అత్యంత సన్నిహితుడైన గంటా శ్రీనివాస రావు.. ఇటీవలే చిరంజీవితో కలిసి పలుసార్లు కనిపించారు. చివరికి జగన్‌తో చిరు భేటీలోనూ గంటా పాల్గొంటారని వార్తలొచ్చాయి. కానీ ఆ భేటీకి గంటా దూరంగా ఉన్నారు.

టీడీపీని వీడి ప్రజారాజ్యం పార్టీ తరఫున ఎమ్మెల్యేగా గెలిచిన గంటా.. తర్వాత చిరుతోపాటే కాంగ్రెస్‌లోకి వెళ్లి మంత్రి అయ్యారు. ఆ తర్వాత టీడీపీలో చేరి మళ్లీ మంత్రి అయ్యారు. ఇటీవలి ఎన్నికల్లో విశాఖ నుంచి గెలుపొందారు. చిరంజీవి రాజకీయాలకు దూరమైనా.. గంటా మాత్రం ఆయనకు దగ్గరగానే ఉన్నారు. బాబు కంటే చిరంజీవికే ఆయన ఎక్కువ ప్రాధాన్యం ఇస్తారు.

మెగా ఫ్యామిలీ వైజాగ్‌లో అడుగుపెట్టిన దగ్గర్నుంచి.. తిరిగి విమానం ఎక్కే వరకు గంటా పక్కన ఉండాల్సిందే. అలాంటిది జనసేన కార్యక్రమంలో పాల్గొనాలని టీడీపీ అధినేత ఆదేశించినా గంటా ఎక్కడా కనిపించలేదు.

Read Also: జగన్ అలా చేస్తే.. నేను వెళ్లి సినిమాలు చేసుకుంటా.. పవన్ ఆసక్తికర వ్యాఖ్యలు

అసెంబ్లీ ఎన్నికల ముందు గంటా జనసేనలో చేరతారని వార్తలొచ్చాయి. కానీ గంటా లాంటి నేతలను పార్టీలోకి చేర్చుకునేది లేదని పవన్ తెగేసి చెప్పారు. గంటాను ఓడించాలని ఆయన పిలుపునిచ్చారు. అదీగాకుండా ఆయన ఇప్పుడు వైఎస్ఆర్సీపీ నేతలతో టచ్‌లో ఉన్నారని ప్రచారం జరుగుతోంది. పవన్‌కు వ్యక్తిగతంగా గంటా తీరు నచ్చకపోవడం వల్లే జనసేన కార్యక్రమానికి ఆయన దూరంగా ఉన్నారనే గుసగుసలు వినిపిస్తున్నాయి.