YSRCP: జగన్ పార్టీలోకి కరణం బలరాం కుమారుడు.. ఈ ఎమ్మెల్యేదీ అదే స్ట్రాటజీ

ఏపీలో టీడీపీకి వరుస షాకులు తగులుతున్న వేళ.. ప్రకాశం జిల్లాకు చెందిన సీనియర్ నేత, చీరాల ఎమ్మెల్యే కరణం బలరాం సీఎం జగన్‌ను కలిశారు. ఆయన కుమారుడు కరణం వెంకటేశ్.. జగన్ సమక్షంలో వైఎస్సార్సీపీలో చేరారు. కరణం వెంకటేశ్‌తోపాటు మాజీ మంత్రి పాలేటి రామారావు కూడా వైఎస్సార్‌సీపీలో చేరారు. ఇప్పటి వరకూ గన్నవరం ఎమ్మెల్యే వల్లభనేని వంశీ, గుంటూరు పశ్చిమ ఎమ్మెల్యే మద్దాలి గిరి చంద్రబాబుకు షాకివ్వగా.. కరణం బలరాం కూడా అదే బాటలో నడవడం గమనార్హం.

ఎమ్మెల్యేలు ఎవరైనా తమ పార్టీలో చేరాలంటే ముందుగా పదవులకు రాజీనామా చేయాలని అసెంబ్లీ సాక్షిగా జగన్ ప్రకటించిన సంగతి తెలిసిందే. దీంతో టీడీపీ ఎమ్మెల్యేలెవరూ వైఎస్సార్సీపీలో అధికారికంగా చేరడం లేదు. తనను ప్రత్యేక సభ్యుడిగా గుర్తించాలని వంశీ ఇంతకు ముందే అసెంబ్లీ స్పీకర్‌ను కోరిన సంగతి తెలిసిందే. టీడీపీ తరఫున 23 మంది ఎమ్మెల్యేలుగా గెలవగా.. ముగ్గురు ఆ పార్టీకి దూరం కావడంతో అసెంబ్లీలో టీడీపీ బలం 20కి పడిపోయింది.

ప్రకాశం జిల్లాలో కరణం బలరాం, గొట్టిపాటి రవికురమార్ వర్గీయుల మధ్య విబేధాలున్నాయి. వైసీపీ నుంచి టీడీపీలో చేరిన గొట్టిపాటి రవికుమార్.. అద్దంకి నుంచి ఎమ్మెల్యేగా గెలుపొందారు. వీరిద్దరి మధ్య విబేధాల నేపథ్యంలో కరణం బలరామకృష్ణమూర్తి టీడీపీకి దూరం కావడం ప్రకాశం జిల్లా రాజకీయాలపై ప్రభావం చూపనుంది. బాలయ్య ప్రాణ స్నేహితుడు, మాజీ ఎమ్మెల్యే కదిరి బాబూరావు కూడా కొద్ది రోజుల క్రితమే వైఎస్సార్సీపీలో చేరిన సంగతి తెలిసిందే.

కరణం బలరామకృష్ణమూర్తి గత ఎన్నికల్లో ప్రకాశం జిల్లా చీరాల నుంచి ఆమంచి కృష్ణమోహన్‌పై గెలుపొందారు. బలరాం గతంలో అద్దంకి నుంచి పోటీ చేసేవారు. కానీ ఆమంచి టీడీపీని వీడి వైఎస్సార్సీపీలో చేరడంతో.. బాబు తన మిత్రుడైన బలరాంను చీరాలలో పోటీకి దింపారు. ఎన్నికలకు ముందు నియోజకవర్గ బాధ్యతలు స్వీకరించిన ఆయన.. కృష్ణమోహన్‌పై 17వేల పైచిలుకు ఓట్ల తేడాతో గెలుపొందారు. గతంలో కాంగ్రెస్‌లో పని చేసిన బలరాం.. ఎన్టీఆర్ పిలుపుతో టీడీపీలో చేరారు. చంద్రబాబుకు అత్యంత సన్నిహితంగా ఉండే కొంతమంది నేతల్లో బలరాం కూడా ఒకరు.