YS Jaganను కలిశాక.. టీడీపీ ఎమ్మెల్యే ఆసక్తికర వ్యాఖ్యలు.. అదే బాటలో..!

గుంటూరు జిల్లాకు చెందిన టీడీపీ ఎమ్మెల్యే మద్దాలి గిరిధర్.. సీఎం జగన్‌ను కలవడం రాజకీయ వర్గాల్లో చర్చనీయాంశమైంది. వల్లభనేని వంశీ తరహాలోనే మద్దాలి గిరి కూడా టీడీపీని వీడతారని ప్రచారం జరిగింది. ఈ ప్రచారానికి బలం చేకూర్చేలా.. సీఎంతో భేటీ అనంతరం టీడీపీ ఎమ్మెల్యే ఆసక్తికర వ్యాఖ్యలు చేశారు. నియోజకవర్గ సమస్యలపై చర్చించడం కోసం తాను సీఎంను కలిశానని ఆయన చెప్పారు.

సీఎంను కలవడం సంతోషంగా ఉందన్న మద్దాలి గిరి.. గుంటూరు పట్టణానికి సంబంధించిన వివిధ పనుల కోసం నిధులు మంజూరు చేయాలని కోరానని తెలిపారు. తన రిక్వెస్ట్‌ పట్ల సీఎం సానుకూలంగా స్పందించారని.. సీఎఫ్ఎంఎస్‌లో పెండింగ్‌లో ఉన్న రూ.25 కోట్ల బకాయిలు వెంటనే రిలీజ్ చేయాలని అధికారులను ఆదేశించారని మద్దాలి గిరి తెలిపారు.

రాజధాని విషయంలో జగన్‌కు స్పష్టమైన ఆలోచన ఉందని మద్దాలి గిరి తెలిపారు. అమరావతిలో రాజధాని అభివృద్ధి కోసం లక్ష కోట్ల రూపాయలు ఖర్చు చేసే స్థోమత ప్రభుత్వానికి లేదన్నారు. లెజిస్లేటివ్ క్యాపిటల్ అమరావతిలోనే ఉంటుందని జగన్ చెప్పారని టీడీపీ ఎమ్మెల్యే తెలిపారు.

గత ఐదేళ్లలో అమరావతిలో అభివృద్ధి జరగలేదని, రాజధాని రైతుల ఆందోళనకు చంద్రబాబే కారణమని మద్దాలి గిరి ఆరోపించారు. హైపవర్ కమిటీ రిపోర్ట్ వచ్చిన తర్వాత రాజధానిపై స్పష్టత వస్తుందని, అప్పటివరకు వేచిచూడాలని ఆయన రైతులకు విజ్ఞప్తి చేశారు. రాజధాని రైతులు ఆందోళన చెందొద్దన్నారు. పార్టీ మారడం గురించి చర్చ జరగలేదన్నారు.

వైఎస్ హయాంలో రాష్ట్రంలో పారిశ్రామిక అభివృద్ధి జరిగిందని.. అలాంటి విప్లవం జగన్‌ పాలనలో వస్తుందనే నమ్మకం తనకు ఉందన్నారు. ప్రభుత్వ పాఠశాలల్లో ఇంగ్లిష్ మీడియం ప్రవేశపెట్టే అంశంపై చంద్రబాబుది ద్వంద్వ వైఖరని ఆయన విమర్శించారు.