వార్డు వాలంటీర్ల మొబైల్స్‌ సీజ్‌ చేయండి.. ఏపీ హైకోర్టులో సంచలన పిటిషన్

వాలంటీర్లకు మొబైల్స్ ఇవ్వడంపై మరోసారి ఏపీ హైకోర్టులో పిటిషన్ దాఖలైంది. విశాఖకు చెందిన టీడీపీ ఎమ్మెల్యే వెలగపూడి రామకృష్ణబాబు ఈ పిటిషన్‌ దాఖలుచేశారు. విశాఖ కార్పొరేషన్‌ ఎన్నికల్లో అధికార పార్టీ అభ్యర్థులకు ఓటు వేయకపోతే సంక్షేమ పథకాలు నిలిపివేస్తామని వార్డు సచివాలయ ఉద్యోగులు, వాలంటీర్లు లబ్ధిదారులను బెదిరిస్తున్నారని ఆరోపించారు. ఎన్నికలు ముగిసే వరకు వారికి ఇచ్చిన మొబైల్స్ సీజ్‌ చేయాలని కోరారు. ఎన్నికల కోడ్‌ దృష్ట్యా ప్రభుత్వ కార్యాలయాలపై ఉన్న అధికారపార్టీ రంగులను తొలగించేలా అధికారులకు ఆదేశాలు ఇవ్వాలని ఆ పిటిషన్‌లో కోరారు. రంగులపై గతంలో ధర్మాసనం ఇచ్చిన ఆదేశాలను అమలు చేయాలన్నారు. ఈ పిటిషన్‌పై కోర్టు స్పందించింది.. ఈ వ్యవహారంపై పూర్తి వివరాలు సమర్పించాలని ఎస్‌ఈసీ, రాష్ట్ర ప్రభుత్వం, జీవీఎంసీని ఆదేశిస్తూ విచారణను సోమవారానికి వాయిదా వేసింది. ఈ మేరకు హైకోర్టు న్యాయమూర్తి జస్టిస్‌ డీవీఎ్‌సఎస్‌ సోమయాజులు బుధ వారం ఆదేశాలు ఇచ్చారు. పిటిషనర్‌ ఎమ్మెల్యే వెలగపూడి తరఫున న్యాయవాది ప్రణతి వాదనలు వినిపించారు. హైకోర్టు ఎలాంటి నిర్ణయం తీసుకుంటుంది అన్నది ఆసక్తికరంగా మారింది.