అదే జరిగితే జగన్ సర్కార్ బర్తరఫ్: ఎమ్మెల్సీ ఆసక్తికర వ్యాఖ్యలు

ఏపీ ఎస్‌ఈసీ నిమ్మగడ్డ వ్యవహారంలో జగన్ సర్కార్ తీరు అభ్యంతకరం అన్నారు టీడీపీ ఎమ్మెల్సీ దీపక్ రెడ్డి. హైకోర్టు చాలా స్పష్టంగా ముఖ్యమంత్రి వేరు, ఎస్ఈసీ వేరని చెప్పిందని.. వైఎస్సార్‌సీపీ ప్రభుత్వం నిమ్మగడ్డపై తప్పుడు కథనాలు ప్రచారం చేయిస్తోందని మండిపడ్డారు. నిమ్మగడ్డపై ఎంత ఒత్తిడి చేసినా ఆయన భయపడకుండా విచారణ జరిపించాలని సూచించారు. కొన్నినెలల్లో రిటైరయ్యే నిమ్మగడ్డ, నిజాయితీతో, నిష్పక్షపాతంతో, నిర్భయంగా వ్యవహరించి.. స్థానిక ఎన్నికలు జరిపించాలని సూచించారు.

స్థానిక ఎన్నికల్లో 2,500 ఘటనలు జరిగినా చర్యలు లేవని.. స్థానిక ఎన్నికల ముసుగులో జరిగిన అక్రమాలు, అరాచకాలపై సీబీఐ విచారణ జరిపించాలని డిమాండ్ చేశారు. అదే జరిగితే జగన్ ప్రభుత్వం బర్తరఫ్ అవ్వడం ఖాయమన్నారు. ఏం చేసైనా సరే స్థానిక ఎన్నికల్లో గెలవాలని ప్రభుత్వం చూస్తోందన్నారు. ఇప్పటికే ఓట్ల తొలగింపు, ప్రతిపక్ష అభ్యర్థులను బెదిరించడం, నామినేషన్లు వేసేవారిని అడ్డుకోవడం, తప్పుడు కారణాలతో నామినేషన్లు తిరస్కరించడం, ప్రలోభాలకు గురిచేయడం, దాడికి పాల్పడటం, అక్రమ కేసులు పెట్టడం వంటివి చేశారన్నారు. వైఎస్సార్‌సీపీ ప్రభుత్వ అక్రమాలు, అన్యాయాలను బయటపెడితే.. నిమ్మగడ్డ పేరు దేశచరిత్రలో నిలిచిపోతుందన్నారు. పార్టీలకు అతీతంగా వ్యవస్థలను కాపాడుకోవాల్సిన బాధ్యత అందరిపై ఉందన్నారు.

పలువురు మంత్రులు, ఎంపీలు, ఎమ్మెల్యేలు నిమ్మగడ్డపై చేసిన వ్యాఖ్యలపై ఏం సమాధానం చెబుతారని దీపక్ రెడ్డి ప్రశ్నించారు. వైఎస్సార్‌సీపీ నేతల్లా టీడీపీ నేతలు దిగజారి మాట్లారని.. నిమ్మగడ్డ టీడీపీకి అనుకూలమైతే, టీడీపీ ఫిర్యాదులపై ఆయన ఎందుకు చర్యలు తీసుకోలేదో చెప్పాలన్నారు. తనకు రక్షణ కావాలని నిమ్మగడ్డ, ఢిల్లీకి లేఖ రాస్తే.. ఆ లేఖను ఎంపీ విజయసాయిరెడ్డి తప్పుపట్టారని గుర్తు చేశారు. రక్షకులుగా వ్యవహరించాల్సిన అధికారులే ప్రజలపట్ల భక్షకులుగా వ్యవహరిస్తున్నారని మండిపడ్డారు.