YSRCPకి యూత్ లీడర్ రాజీనామా.. తాడికొండ ఎమ్మెల్యేపై సంచలన వ్యాఖ్యలు

అమరావతి ప్రాంతంలో వైఎస్సార్‌సీపీకి యువజన నేత షాకిచ్చారు. తుళ్ళూరు మండల వైఎస్సార్‌సీపీ యువజన అధ్యక్ష పదవికి బెజ్జం రాంబాబు రాజీనామా చేశారు. ఆ లేఖను జిల్లా పార్టీ అధ్యక్షుడు అయిన అప్పిరెడ్డికి పంపించారు. తాడికొండ ఎమ్మెల్యేపై సంచలన వ్యాఖ్యలు చేశారు.. శ్రీదేవి అవినీతికి పాల్పడుతున్నారని మండిపడ్డారు. నామినేటెడ్ పదవులు అమ్ముకుంటున్నారని ఆరోపించారు.. పార్టీలో తనకంటూ ఏ గుర్తింపు లేదని అందుకే రాజీనామా చేస్తున్నాను అన్నారు.

ఎమ్మెల్యే ఉండవల్లి శ్రీదేవి మార్కెట్ యార్డ్ పదవులు అమ్ముకుంటున్నారని రాంబాబు విమర్శించారు. డైరెక్టర్ పదవులకు ఓసీలైతే రూ.5 లక్షలు, బీసీలు రూ.3 లక్షలు ఎస్సీలు రూ.2 లక్షలు డిమాండ్ చేస్తున్నారని ఆరోపించారు. తాడికొండ నియోజకవర్గంలో ప్రతి పనికి రేటు నిర్ణయించి తన అనుచరులతో డబ్బులు వసూలు చేయిస్తున్నారని సంచలన వ్యాఖ్యలు చేశారు.

పార్టీ స్థాపించిన రోజు నుంచి సామాన్య కార్యకర్తగా కష్టపడ్డానని.. అందుకే తనకు మండల యువజన అధ్యక్షుడి పదవి ఇచ్చారన్నారు. పార్టీ అధికారంలోకి వచ్చిన తర్వాత.. పదేళ్లు పార్టీ కోసం పనిచేసిన కార్యకర్తలకు గుర్తింపు, విలువ లేదన్నారు. రోడ్లు వేయాలన్నా కమిషన్లు అడుగుతున్నారన్నారు. తాడికొండ నియోజకవర్గంలో పార్టీని బతికించాలని కోరారు రాంబాబు.