Hyd: హైదరాబాద్ నుంచి ఆంధ్రా వచ్చే వారికి శుభవార్త.. సంక్రాంతి టూర్ ఇలా ప్లాన్ చేసుకోండి!

సంక్రాంతి పండుగను పురస్కరించుకుని హైదరాబాద్ నుంచి ఆంధ్రప్రదేశ్ రాష్ట్రవ్యాప్తంగా బస్సులు నడపనున్నట్లు తెలంగాణ ఆర్టీసీ వెల్లడించారు. జనవరి 8 నుంచి 14వ తేదీ వరకు మొత్తం 1,600 ప్రత్యేక బస్సులు నడపనునట్లు టీఎస్‌ ఆర్టీసీ రంగారెడ్డి జిల్లా ప్రాంతీయ మేనేజర్ బి.వరప్రసాద్‌ వెల్లడించారు. ఈ నెల 8 నుంచి అడ్వాన్స్‌ రిజర్వేషన్‌ కూడా చేసుకోవచ్చని తెలిపారు. హైదరాబాద్‌ నుంచి ఆంధ్రప్రదేశ్‌కు 1600 బస్సులు టీఎస్‌ఆర్టీసీ నడపనుంది.

హైదరాబాద్ నగరంలోని ఎంజీ బస్ స్టేషన్, జూబ్లీ బస్ స్టేషస్, సెంట్రల్‌ బస్ స్టేషన్‌ (సీబీఎస్‌), ఉప్పల్ క్రాస్ రోడ్, ఎల్బీ నగర్, లింగంపల్లి, చందానగర్, ఈసీఐఎల్‌, కేపీహెచ్‌బీ కాలనీ, ఎస్‌ఆర్‌ నగర్, అమీర్‌పేట, టెలిఫోన్ భవన్‌, దిల్‌సుఖ్‌నగర్‌ డిపోల నుంచి ఆంధ్రప్రదేశ్ రాష్ట్రవ్యాప్తంగా ప్రత్యేక బస్సులు అందుబాటులో ఉన్నాయని వరప్రసాద్‌ చెప్పారు. అంతే కాకుండా జంట నగరాల పరిధిలోని శివారు కాలనీల్లో నివసించే వారికి సమీపంలోని ముఖ్యమైన పాయింట్ల నుంచి కూడా ప్రత్యేక బస్సులను నడపనున్నట్లు వివరించారు.

హైదరాబాద్ నుంచి ఆంధ్రప్రదేశ్‌లోని విజయవాడ, విజయనగరం, తెనాలి, గుంటూరు, గుడివాడ, రాజమండ్రి, కాకినాడ, రాజోలు, పోలవరం, మచిలీపట్నం, ఏలూరు, తాడేపల్లిగూడెం, తణుకు, విశాఖపట్నం, శ్రీకాకుళం, భీమవరం, నర్సాపురం, కర్నూలు, అనంతపురం, కడప, చిత్తూరు, ఒంగోలు, నెల్లూరు, తిరుపతి, ఉదయగిరి, కనిగిరి, కందుకూరు, పామూరు, పొదిలి తదితర ప్రాంతాలకు సంక్రాంతి ప్రత్యేక బస్సులు నడపనున్నట్లు వరప్రసాద్ వెల్లడించారు. సంక్రాంతి పండుగ వేళ ప్రయాణికుల రద్దీ దృష్ట్యా www.tsrtconline.in వెబ్‌సైట్‌ ద్వారా అడ్వాన్స్‌ రిజర్వేషన్‌ చేసుకునేందుకు ఏర్పాట్లు చేసినట్లు వరప్రసాద్‌ తెలిపారు.