Jr NTR ట్రాన్స్‌ఫార్మర్ లాంటోడు.. లోకేశ్ పాలు, పెరుగు అమ్ముకుంటే బెటర్: వల్లభనేని వంశీ

2014 ఎన్నికల్లో పవన్ కళ్యాణ్ ఇంటికి వెళ్లి మరీ మద్దతు కోరిన చంద్రబాబు నాయుడు.. జూనియర్ ఎన్టీఆర్‌ను ఎందుకు కలవలేదని వల్లభనేని వంశీ ప్రశ్నించారు. పవన్ ఇంటికి వెళ్లి.. దాదాపుగా ఆయన కాళ్లు పట్టుకున్నంత పని చేసిన చంద్రబాబు.. 2014 ఎన్నికల్లో టీడీపీ తరఫున జూనియర్‌ ఎన్టీఆర్‌ను ఎందుకు కలవలేదని ఆయన నిలదీశారు. ప్లాన్ ప్రకారమే తారక్‌ను వాడుకొని పక్కనబెట్టారని ఆయన ఆరోపించారు.

నారా లోకేశ్ కోసమే ఎన్టీఆర్‌ను పక్కనబెట్టారన్న వంశీ.. తారక్ ట్రాన్స్‌ఫార్మర్ లాంటోడు.. అతడి ముందు జనాదరణ లేని వాళ్లు నిలబడలేరన్నారు. కెరీర్‌ను ఫణంగా పెట్టి మరీ 2009 ఎన్నికల్లో టీడీపీ తరఫున ప్రచారం చేసిన జూనియర్ ఎన్టీఆర్.. తర్వాత ఎందుకు దూరమయ్యాడు? అని వంశీ ప్రశ్నించారు.

ఓ దినపత్రికలో ఉద్దేశపూర్వకంగానే తారక్‌పై కథనాలు రాయించారని.. వాడుకొని వదిలేశారని.. దీంతో అతడు పక్కకు తప్పుకున్నాడని వంశీ చెప్పారు. ఎన్టీఆర్‌ను కూడా వైఎస్ఆర్సీపీ వైపు తీసుకెళ్తారా అనే ప్రశ్నకు స్పందిస్తూ.. జరిగింది చెప్పాను కానీ.. భవిష్యత్తును ఊహించలేమన్నారు. ఆయన సినిమాలు చేసుకుంటున్నారని చెప్పారు. నాకు తెలిసినంత వరకు తారక్ వేరే పార్టీల వైపు చూడటం లేదన్నారు.

వైఎస్ఆర్సీపీలో చేరడం వల్ల ఎమ్మెల్యే పదవికి రాజీనామా చేయాల్సి వస్తే అందుకు సిద్ధంగా ఉన్నామని వంశీ తెలిపారు. యార్లగడ్డ వెంకట్రావ్‌తో కలిసి పని చేసేందుకు సిద్ధంగా ఉన్నానన్నారు. వైఎస్ జగన్‌తో నాకు పాతికేళ్ల పరిచయం ఉందన్నారు.

Read Also: టీడీపీలో నాకు లింక్ ఆయన ఒక్కడితోనే: వంశీ

నారా లోకేశ్‌ను టీడీపీ వర్కింగ్ ప్రెసిడెంట్ చేస్తారన్న వ్యాఖ్యలపై వంశీ స్పందిస్తూ.. ఆయన్ను హెరిటేజ్ పాలు, పెరుగు అమ్ముకోనీయండన్నారు. పార్టీని మంచి నేత చేతిలో పెట్టాలన్నారు. 2024లో టీడీపీ నామమాత్రంగా పోటీ చేస్తుంది. కానీ 2029 నాటికి తెలుగుదేశం ఉండదన్నారు.