స్కిల్‌ డెవలప్‌మెంట్‌ కేసులో కీలక పరిణామం.. భాస్కర్‌ రిమాండ్‌ను తిరస్కరించిన కోర్టు!

స్కిల్‌ డెవలప్‌మెంట్‌ కేసులో భాస్కర్‌ రిమాండ్‌ను విజయవాడ సీఐడీ కోర్టు తిరస్కరించింది. భాస్కర్‌ను సీఐడీ అధికారులు విచారించాలని అనుకుంటే 41-ఏ సీఆర్పీసీ ప్రకారం చేయవచ్చని కోర్టు ఆదేశాలు జారీ చేసింది. సీమెన్స్‌ కంపెనీలో పని చేస్తున్న సత్య భాస్కర్‌ ప్రసాద్‌ లబ్ధిదారుడు కాదని, అన్యాయంగా అరెస్టు చేశారని ఆయన తరఫు న్యాయవాది వాదనలు వినిపించారు.

సీఐడీ అధికారులు భాస్కర్‌పై నమోదు చేసిన సెక్షన్లు వర్తించవని న్యాయవాడి పేర్కొన్నారు. ఇప్పటికే పలుమార్లు భాస్కర్‌ను సీఐడీ విచారించిందని తెలిపారు. ఆయన విచారణకు సహకరిస్తున్నారని న్యాయస్థానం దృష్టికి తీసుకొచ్చారు. ఈ సమయంలో హఠాత్తుగా అరెస్ట్ చేయడం వెనుక రాజకీయ కారణాలు ఉన్నాయని భాస్కర్ తరఫు న్యాయవాది కోర్టుకు తెలిపారు.

రెండు వైపులా వాదనలు విన్న న్యాయస్థానం రిమాండ్‌ను తిరస్కరిస్తూ ఆదేశాలు జారీ చేసింది. స్కిల్ డెవలప్‌మెంట్ కార్పొరేషన్‌లో అవతవకలు జరిగాయని సీఐడీ కేసు నమోదు చేసిన విషయం తెలిసిందే. ఇందులో భాగంగా భాస్కర్‌ను నోయిడాలో అరెస్ట్ చేసి ట్రాన్సిట్ వారెంట్‌పై విజయవాడ కోర్టుకు తీసుకొచ్చారు.