ఏపీలో మళ్లీ కరోనా పంజా: ఒకే కుటుంబంలో నలుగురు మృతి.. నెల గ్యాప్‌లో!

కరోనా వైరస్ మహమ్మారి ఏపీలో విలయతాండవం చేస్తోంది. కరోనా తగ్గుముఖం పట్టిందని అందరూ భావిస్తున్న తరుణంలో మళ్లీ పంజా విసురుతోంది. చలికాలం మొదలైన తరుణంలో కరోనా రెండో దశ ప్రారంభమవుతుందని ప్రభుత్వం ఇటీవలే హెచ్చరించిన విషయం తెలిసిందే. ఈ తరుణంలో విజయవాడలో ఓ న్యాయవాది కుటుంబంలో నెల రోజుల్లోనే నలుగురు కరోనా బారినపడి మృతి చెందారు.

ఈ సంఘటన స్థానికంగా ఒక్కసారిగా కలకలం రేపింది. కరోనా విషయంలో జాగ్రత్తలు తీసుకోకపోతే ఇబ్బందులు తప్పవని ఈ ఘటన రుజువు చేసింది. విజయవాడకు చెందిన ప్రముఖ న్యాయవాది తల్లి అక్టోబర్ 8వ తేదీన మరణించింది. అక్టోబర్ 30వ తేదీన న్యాయవాది భార్య మరణించింది. భార్య అంత్యక్రియలు నిర్వహిస్తున్న సమయంలోనే న్యాయవాది కూడ మరణించాడు. ఈ ముగ్గురూ కరోనా బారినపడే మరణించారు.

ఈ తరుణంలో కరోనాతో బాధపడుతున్న న్యాయవాది కొడుకు ఆస్పత్రిలో చికిత్స పొందుతూ ఆదివారం మృతి చెందాడు. నెల రోజుల వ్యవధిలో ఒకే కుటుంబానికి చెందిన నలుగురు కరోనాతో మరణించడంతో బంధు మిత్రులు కన్నీరు మున్నీరుగా విలపిస్తున్నారు.