స్కూలుకెళ్లే బాలికల్ని ట్రాప్ చేసి.. నగ్న వీడియోలతో బెదిరించి.. బెజవాడ కేటుగాడు దొరికాడిలా!

తమిళ సినిమాల స్ఫూర్తితో ఓ బెజవాడ కుర్రాడు హైస్కూల్ అమ్మాయిలను ట్రాప్ చేయడం ఎలాగో నేర్చుకున్నాడు. పేరున్న స్కూళ్లలో చదువుతున్న అమ్మాయిలను మాయ మాటలతో నమ్మించి ముగ్గులోకి దింపేవాడు. అనంతరం వారిపై అత్యాచారం చేసేవాడు. బాలికల నగ్నవీడియోలు తీసి డబ్బులు ఇవ్వాలని బెదిరించేవాడు. లేదంటే వీడియోలను బయటపెడతానని బ్లాక్ మెయిల్ చేసేవాడు. దీంతో భయపడిన అమ్మాయిలు ఎలాగోలా అతడికి డబ్బులు తెచ్చి ఇచ్చేవారు. కొందరైతే ఇంట్లోని బంగారాన్ని దొంగిలించి మరీ అతడికి డబ్బులిచ్చారు.

అమ్మాయిలను మోసం చేసిన ఆ కేటుగాడి పేరు జగదీశ్, వయసు 19 ఏళ్లు. మైనర్ బాలికలను ట్రాప్ చేసి, వారిని శారీరకంగా వాడుకొని డబ్బులు దండుకోవడమే పనిగా పెట్టుకున్న జగదీశ్‌.. ఓ మైనర్ బాలికను కూడా ఇలాగే బెదిరించే ప్రయత్నం చేశాడు. ఆ అమ్మాయి తండ్రికి చెప్పడంతో.. ఆయన ఈ కేటుగాడిని బంధించాడు.

దీంతో తన కుమారుడు కనిపించడం లేదంటూ జగదీశ్ తండ్రి నాలుగు రోజుల క్రితం పోలీసులకు ఫిర్యాదు చేశారు. ఓ వ్యక్తి తన కొడుకు కిడ్నాప్ చేశారని పోలీసులకు తెలిపారు. రంగంలోకి దిగిన పోలీసులు ఆరా తీయగా అసలు విషయం బయటకు వచ్చింది.

జగదీశ్‌ ఫోన్లో అమ్మాయిల నగ్న వీడియోలు ఉండటాన్ని పోలీసులు గుర్తించారు. అతడికి మరో ముగ్గురు స్నేహితులు సహకరించారని విచారణలో తేలింది. ఇప్పటి వరకూ అతడు ఆరుగురు అమ్మాయిలను ఇలా మోసం చేశాడని తేల్చారు. మరి కొందరు అమ్మాయిలను సైతం అతడు మోసం చేసి ఉండొచ్చని భావిస్తున్నారు.

నిందితుడిపై అత్యాచారం, కిడ్నాప్, దౌర్జన్యం, బలవంతపు వసూళ్లు, చంపుతానని బెదిరించడంలాంటి అనేక సెక్షన్ల కింద కేసులు పోలీసులు కేసు నమోదు చేశారు. అతడి స్నేహితుల కోసం పోలీసులు గాలిస్తున్నారు.