సొంత పార్టీ ఎమ్మెల్యేకు షాకిచ్చిన జగన్ సర్కారు..

ఏపీలో ఇసుక కొరతకు కారణం వైఎస్ఆర్సీపీనే అని ఆరోపిస్తున్న చంద్రబాబు.. గురువారం విజయవాడలో దీక్షకు దిగుతున్నారు. 12 గంటలపాటు ఆయన దీక్ష చేపడుతున్నారు. బాబు చేపడుతున్న ఇసుక దీక్షకు పోటీగా తాను కూడా దీక్ష చేపడతానని వైఎస్ఆర్సీపీ ఎమ్మెల్యే పార్థసారథి ప్రకటించారు. బాబు దీక్ష వేదికకు సమీపంలోనే తాను కూడా నిరసన చేపడతానన్నారు. చంద్రబాబు తనపై తప్పుడు ఆరోపణలు చేస్తున్నారని.. ఆయనపై పరువు నష్టం దావా వేస్తానని హెచ్చరించారు.

ధర్నా చౌక్ వద్ద తన దీక్షకు అనుమతించాలని హోంమంత్రి, పోలీసు ఉన్నతాధికారులను పార్థసారథి కోరారు. నగర పోలీస్ కమిషనర్‌కు లేఖ రాశారు. కాగా ఆయన దీక్షకు పోలీసులు అనుమతి ఇవ్వలేదు. ఉద్రిక్తతలకు తావివ్వొద్దనే కారణంతోనే జగన్ సర్కారు ఈ నిర్ణయం తీసుకుందని భావిస్తున్నారు.

మున్సిపల్ స్టేడియంలో దీక్ష చేపట్టాలని తొలుత చంద్రబాబు నాయుడు భావించారు. కానీ ప్రభుత్వం అందుకు అనుమతించలేదు. ఈ స్టేడియంలో ప్రభుత్వ కార్యక్రమాలకు మాత్రమే అనుమతి ఉందని స్పష్టం చేశారు. దీంతో దీక్ష వేదికను ధర్నా చౌక్‌కు మార్చారు.