గ్రామ వాలంటీర్లు.. జగన్ సర్కారు యువతతో రూ.5 వేల కూలీ చేయిస్తోంది: జనసేన

ప్రభుత్వాలకు యువత అంటే ఎందుకు అంత చిన్నచూపు? అని జనసేన ప్రశ్నించింది. ఎన్నో కలలతో, జీవితంలో ఏదో సాధించాలి అనే ఆశయాలతో ఉన్నత చదువులు చదువుతున్న యువతకు.. ప్రభుత్వం నైపుణ్యంతో కూడిన ఉపాధి ఎందుకు కల్పించలేకపోతోంది? అని ప్రశ్నించింది. ప్రభుత్వాలు మారినా యువత జీవితాల్లో మార్పు ఎందుకు రావట్లేదని నిలదీసింది. యువతకు కావల్సింది నిరుద్యోగభృతి కాదు, తమ కాళ్లపై తాము నిలబడగలిగే ఉపాధి కల్పన కావాలని తెలిపింది.

గత ప్రభుత్వం వెయ్యి రూపాయలు నిరుద్యోగ భృతి పేరిట యువత మొహాన పడేస్తే.. జగన్ సర్కారు ఐదంకెల జీతం సంపాదించే శక్తి ఉన్న పట్టభద్రులతో "గ్రామ వాలంటీర్లు" పేరిట రూ.5 వేల కూలీ పని చేయిస్తోందని జనసేన ఆరోపించింది.

యువతలో శక్తిని నిర్వీర్యం చేసే "గ్రామ వాలంటీర్లు" అనే ప్రక్రియ యువతకు తాత్కాలిక ఉపశమనం కూడా ఇవ్వడం లేదని జనసేన ఆవేదన వ్యక్తం చేసింది. గ్రామవాలంటీర్ల వ్యవస్థ యువతలో ఎదగాలి అనే ఆశలను చిదిమేస్తోందని ఆరోపించింది. వైఎస్ఆర్సీపీ ప్రభుత్వం యువత సామర్థానికి తగిన ఉపాధి కల్పించాలని జనసేన డిమాండ్ చేసింది.

‘‘ప్రభుత్వాలు నాణ్యమైన విద్యావ్యవస్థ ఏర్పాటు చేసి, వృత్తి నైపుణ్య కేంద్రాలను ఏర్పాటు చేసి.. చదువులు పూర్తయిన వెంటనే ఉద్యోగాలు సాధించేలా కృషిచేయాలి కానీ, మన తెలుగు రాష్ట్రాల్లో ప్రభుత్వాలు మాత్రం యువతను ఎన్నికల్లో ఓట్ల యంత్రాలుగా వాడుకుంటూ, వారి అభివృద్ధిని గాలికి వదిలేస్తున్నార’’ని జనసేన పార్టీ విమర్శించింది.

వృత్తి నైపుణ్యం పెంచే సంస్థలు ఏర్పాటు చేయాలని.. ఉపాధి కల్పించే సంస్థలను ఏర్పాటు చేయాలని.. స్థానికంగా ఉన్న ఉపాధి అవకాశాలు మెరుగుపరచి వలసలను తగ్గించాలని జగన్ సర్కారును జనసేన కోరింది. ఉద్యోగం చేయాలంటే రాజధానికి వెళ్లాలనే ఆలోచన రాని సమతుల అభివృద్ధి జరగాలి అని తమ పార్టీ కోరుకుంటుందని జనసేన తెలిపింది.