విశాఖ డెయిరీ ఛైర్మన్ కన్నుమూత.. సీఎం జగన్ దిగ్భ్రాంతి

విశాఖ డెయిరీ చైర్మన్ ఆడారి తులసీరావు బుధవారం కన్నుమూశారు. గత కొంతకాలంగా అనారోగ్య సమస్యలతో బాధపడుతున్న తులసీరావు.. హైదరాబాద్‌లోని కిమ్స్ ఐకాన్ ఆస్పత్రిలో చికిత్స పొందుతూ బుధవారం తుది శ్వాస విడిచారు. తులసీరావు మృతి పట్ల పలువురు సంతాపం తెలిపారు. గురువారం ఉదయం తులసీరావు పార్థీవదేహాన్ని ఆయన స్వగ్రామమైన యలమంచిలికి తరలించనున్నారు.

1939 ఫిబ్రవరి 1న అనకాపల్లి జిల్లా యలమంచిలిలో వెంకటరామయ్య, సీతయ్యమ్మ దంపతులకు తులసీరావు జన్మించారు. సుమారు 35 సంవత్సరాల పాటు విశాఖ డైరీ ఛైర్మన్‌గా కొనసాగిన ఆయన.. విశాఖ డెయిరీని ప్రగతి పథంలో నడిపించారు. రైతుల కోసం విశాఖ డెయిరీ తరఫున కృషి ఆసుపత్రిని ఏర్పాటు చేశారు.

విశాఖ డెయిరీ ఛైర్మన్‌ తులసీరావు మృతి పట్ల ముఖ్యమంత్రి వైఎస్‌ జగన్మోహన్‌రెడ్డి తీవ్ర దిగ్భ్రాంతి వ్యక్తం చేశారు. ఆడారి తులసీరావు డెయిరీ రంగానికి ఎనలేని సేవ చేశారని గుర్తు చేశారు. తులసీరావు కుటుంబ సభ్యులకు సీఎం జగన్ తన ప్రగాఢ సానుభూతి తెలిపారు.