విశాఖ: ప్రేమికుల మధ్య గొడవ, ఉరేసుకున్న ప్రియుడు.. మూడో అంతస్తు నుంచి దూకేసిన యువతి

ప్రేమజంట మధ్య తలెత్తిన గొడవతో ప్రియుడు ఆత్మహత్యకు పాల్పడిన ఘటన విశాఖపట్నం నగర పరిధిలోని మధురవాడలో సోమవారం రాత్రి చోటుచేసుకుంది. స్థానికులు తెలిపిన వివరాల ప్రకారం.. మధురవాడలోని వైఎస్సార్‌ నగర్‌ కాలనీలోని బ్లాక్‌ నంబర్‌ 13లో నివాసముంటున్న అరుణ్‌ కుమార్ (23) ఓ ఫుడ్‌ డెలివరీ సంస్థలో పని చేస్తున్నాడు. కరోనా వైరస్ ప్రబలుతున్న నేపథ్యంలో ప్రస్తుతం ఇంటి వద్దే ఉంటున్నాడు.

అదే కాలనీకి చెందిన యువతి అనితతో గత అరుణ్ కొంతకాలంగా ప్రేమలో ఉన్నాడు. ఈ క్రమంలో సోమవారం రాత్రి వీరిద్దరి మధ్య గొడవ జరగడంతో అరుణ్‌కుమార్‌ ఇంట్లో ఫ్యాన్‌కు ఉరేసుకుని ఆత్మహత్యకు పాల్పడ్డాడు. ఈ విషయం తెలిసి అనిత సైతం ఆత్మహత్యకు ప్రయత్నించింది. భవనం మూడో అంతస్తు నుంచి కిందకు దూకేసింది.

దీన్ని గమనించిన స్థానికులు యువతిని విశాఖపట్నం నగరంలోని ఓ ప్రైవేటు ఆస్పత్రికి తరలించారు. ప్రస్తుతం ఆ యువతి పరిస్థితి కూడా ఆందోళనకరంగా ఉన్నట్లు తెలుస్తోంది. ఘటనాస్థలానికి పీఎం పాలెం ఎస్సై హరికృష్ణ చేరుకుని వివరాలు సేకరించారు. దీనిపై కేసు నమోదు దర్యాప్తు ప్రారంభించినట్లు ఎస్సై తెలిపారు.