ఆంధ్రాకు ‘చల్లటి’ శుభవార్త.. ఈ ప్రాంతాల్లో వర్షాలు కురిసే ఛాన్స్!

ఆంధ్రప్రదేశ్‌లో ఎండలు కుమ్మేస్తున్నాయి. నిప్పులు చెరుగుతున్న ఎండలు, వేడిగాలుల దెబ్బకు జనాలు ఉక్కిరిబిక్కిరి అవుతున్నారు. ఈ తరుణంలో రాష్ట్ర ప్రభుత్వం వాతావరణ శాఖ శుభవార్త చెప్పింది. ఉపరిత ఆవర్తన ద్రోణి విస్తరించడం వల్ల రానున్న 48 గంటల్లో రాష్ట్రంలో పలు ప్రాంతాల్లో విస్తారంగా వర్షాలు పడతాయని విశాఖపట్నం వాతావరణ కేంద్రం శుక్రవారం ప్రకటించింది. ఉత్తర– దక్షిణ ద్రోణి పశ్చిమ విదర్భ నుంచి ఇంటీరియర్‌ కర్ణాటక మీదుగా దక్షిణ తమిళనాడు వరకు ద్రోణి వ్యాపించి ఉంది. 0.9 కిలో మీటర్ల ఎత్తు వద్ద ఇప్పటికే ద్రోణి కొనసాగుతోంది.
సముద్ర మట్టానికి 1.5 కిలో మీటర్ల ఎత్తు వద్ద బిహార్‌ తూర్పు ప్రాంతాల నుంచి ఉత్తర ప్రాంత ఒడిశా వరకు వ్యాపించి ఉన్న ఉత్తర దక్షిణ ద్రోణి తాజాగా, బలహీనపడింది. దీంతో రాబోయే 48 గంటల్లో ఉత్తర కోస్తాంధ్రా, దక్షిణ కోస్తాంధ్రా, రాయలసీమ ప్రాంతాల్లో ఉరుములు, మెరుపులతో పాటు తేలికపాటి నుంచి ఒక మోస్తరు వర్షాలు అక్కడక్కడ కురిసే అవకాశం ఉందని వాతావరణ కేంద్రం తెలిపింది. దీంతో ప్రజలు అప్రమత్తంగా ఉండాలని సూచించింది.