విశాఖ: టీడీపీ ఎమ్మెల్యే అకాడమీలో విద్యార్థుల్ని సెల్లార్‌లో బంధించి చిత్రహింసలు

విశాఖ డిఫెన్స్ అకాడమీలో విద్యార్థులకు వేధింపులు కలకలంరేపింది. అకాడమీలో లోటుపాట్లపై ప్రశ్నించినందుకు తమను సెల్లార్‌లో బంధించారని ఆరోపిస్తున్నారు. మీడియాకు సమాచారం అందడంతో ఈ వివాదం బయటపడింది. విషయం తెలుసుకున్న పోలీసులు స్పాట్‌కు వెళ్లారు.. విద్యార్థుల్ని సెల్లార్ నుంచి బయటకు తీసుకొచ్చారు. ఈ అకాడమీ టీడీపీ ఎమ్మెల్యే వాసుపల్లి గణేష్‌ నడిపిస్తున్నారు.

వైజాగ్‌ డిఫెన్స్ అకాడమీలో ప్లే గ్రౌండ్‌, హార్స్‌రైడింగ్‌, సరైన భోజన వసతులు లేవని నిర్వాహకుల్ని విద్యార్థులు ప్రశ్నించారు. దీంతో ఆగ్రహం వ్యక్తం చేసిన నిర్వాహకులు.. 100మంది విద్యార్థుల్ని బంధించారని ఆరోపణలు వినిపిస్తున్నాయి. విద్యార్థులను చిత్రహింసలకు గురిచేస్తున్నారని డిఫెన్స్‌ అకాడమీపై ఆరోపణలు వచ్చాయి. అంతేకాదు భోజనంలో ఈగలు, పురుగులు ఉన్నాయని విద్యార్థులు చెబుతున్నారు. ఈ వీడియోలను మీడియాకు విడుదల చేశారు. పోలీసులు అకాడమీ నిర్వాహకుల్ని ప్రశ్నిస్తున్నారు.. ఈ వ్యవహారానికి సంబంధించి పూర్తి వివరాలు తెలియాల్సి ఉంది.