విశాఖ: ట్రెక్కింగ్‌లో అపశ్రుతి.. యువతి మెడకు తాడు చుట్టుకుని..

విశాఖ విహారయాత్రలో అపశ్రుతి చోటు చేసుకుంది. ట్రెక్కింగ్‌ చేస్తుండగా.. తాడు యువతి మెడకు చుట్టుకుంది. వెంటనే తోటి స్నేహితులు అప్రమత్తం కావడంతో ఆమె ప్రాణాలతో బయటపడింది. విశాఖ, విజయనగరం, శ్రీకాకుళం జిల్లాలకు చెందిన 25మంది ఓ టీమ్‌గా పాడేరు సమీపంలో అరకులోయ రంగశిల కొండల్లో శనివారం ట్రెక్కింగ్ కోసం వెళ్లారు. ఎత్తైన కొండపై నుంచి కిందకు దిగుతున్నారు.

కొండపై నుంచి కిందకు దిగుతుండగా.. ఓ యువతి మెడకు తాడు చుట్టుకుంది. దీంతో ఆమె తాడుకు వెళాడింది.. యువతి భయంతో గిలగిలా కొట్టుకోగా తోటి స్నేహితులు గమనించారు. వెంటనే యువతి మెడకు చుట్టుకున్న తాడును పక్కకు తప్పించారు. ఆమె ప్రమాదం నుంచి సురక్షితంగా బయటపడటంతో అందరూ ఊపిరి పీల్చుకున్నారు.

యువతికి ప్రాథమిక చికిత్స అందించి.. తర్వాత ఆస్పత్రికి తీసుకెళ్లారు. డాక్టర్లు వైద్య పరీక్షలు నిర్వహించి.. ఎలాంటి ప్రమాదం లేదని తేల్చి చెప్పారు. తాడు ప్రమాదవశాత్తూ యువతి మెడకు చుట్టుకున్నట్లు తోటి స్నేహితులు చెబుతున్నారు. వీకెండ్ కావడంతో సరదాగా ట్రెక్కింగ్ కోసం వచ్చామని తెలియజేశారు. చలికాలం కావడంతో అరకు అందాలు చూడటానికి పర్యాటకులు భారీగా తరలి వస్తుంటారు. అందులో వీకెండ్ కావడంతో ఈ తాకిడి ఇంకా ఎక్కువగా ఉంటుంది.