ఆ విషయంలో జగన్‌ సర్కార్‌కు మద్దతు.. అసెంబ్లీలో చంద్రబాబు

మహిళపై జరుగుతున్న అఘాయిత్యాలపై కఠిన చర్యలు, శిక్షలు తీసుకోవాల్సిందే అన్నారు టీడీపీ అధినేత, ఏపీ ప్రతిపక్ష నేత చంద్రబాబు. సోమవారం అసెంబ్లీలో మహిళ భద్రతపై జరిగిన చర్చలో బాబు మాట్లాడారు. ప్రతి రోజూ ఎక్కడో చోట మహిళలపై అత్యాచారాలు జరుగుతూనే ఉన్నాయన్నారు. వీటికి అడ్డుకట్ట వేయాలంటే చట్టాలను కఠినతరం చేయాల్సిన అవసరం ఎంతైనా ఉందన్నారు. హైదరాబాద్‌లో జరిగిన దిశ ఘటన తనను ఎంతో బాధించిందన్నారు.

మహిళల కోసం ఏ చట్టం తీసుకొచ్చినా.. మహిళల రక్షణ, భద్రత కోసం ఎలాంటి నిర్ణయాలు తీసుకున్నా తాము ప్రభుత్వానికి మద్దతు ఇస్తామన్నారు చంద్రబాబు. మహిళల కోసం ప్రత్యేకంగా చట్టాన్ని తీసుకురావడం చాలా సంతోషమన్నారు. చట్టాలను సమర్థవంతంగా అమలు చేసినప్పుడే వెంటనే శిక్షలు పడతాయని.. ఫలితాలు వస్తాయని అభిప్రాయపడ్డారు. నిందితులు ఎంతటివారైనా శిక్షించే విధంగా చట్టాలు రావాలని వ్యాఖ్యానించారు.

మహిళలపై చేయి వేస్తే.. అదే వాళ్లకు చివరి రోజు కావాలన్నారు చంద్రబాబు. అలాంటి మంచి చట్టం తీసుకురావాలని ప్రభుత్వాన్ని కోరుతున్నాను అన్నారు ప్రతిపక్ష నేత. ఉన్న చట్టాలను సవరించి.. మరింత పటిష్ఠవంతమైన చట్టాలను తీసుకురావాలని అభిప్రాయపడ్డారు. కొత్త ప్రభుత్వం వచ్చిన తర్వాత కూడా కొన్ని ఘటనలు జరగాయని గుర్తు చేశారు. అదే సమయంలో సొంత పార్టీ నేతలను ముఖ్యమంత్రి నియంత్రించాలని సూచించారు. అలాగే ఓ వైఎస్సార్‌సీపీ ఎంపీపైనా అత్యాచారం కేసు ఉందని విమర్శించారు.