YS Jagan మాటలు తేనె పూసిన కత్తులు.. ఆ డబ్బు ఇస్తే ఇంత సంక్షోభం ఉండేదా: యనమల

ముఖ్యమంత్రి వైఎస్ జగన్మోహన్ రెడ్డి వైఖరి సొమ్మొకరిది.. సోకొకడిది అన్న చందంగా ఉందని తెలుగు దేశం పార్టీ సీనియర్‌ నాయకుడు, మాజీ మంత్రి యనమల రామకృష్ణుడు వ్యాఖ్యానించారు. మత్స్యకారులకు ఇవ్వాల్సిన పరిహారాన్ని 6 నెలలుగా తొక్కిపట్టి.. ఇవ్వాల్సిన దాంట్లో సగం పెండింగ్‌ పెట్టింది సీఎం జగన్మోహన్ రెడ్డి కాదా? అని ప్రశ్నించారు. ఈ మేరకు యనమల రామకృష్ణుడు ఓ ప్రకటన విడుదల చేశారు.

తెలుగు దేశం పార్టీ అధినేత చంద్రబాబునాయుడు, జనసేనాని పవన్ కళ్యాణ్, కొన్ని మీడియా సంస్థలను సీఎం జగన్ దుష్టచతుష్టయంగా అభివర్ణించడాన్ని యనమల రామకృష్ణుడు తీవ్రంగా తప్పుపట్టారు. దుష్టబుద్ధి, వక్రబుద్ధి సీఎం జగన్‌దేనని దుయ్యబట్టారు. కోనసీమ జిల్లా మురమళ్లలో సీఎం జగన్ చెప్పిన మాయ మాటలను ప్రజలు నమ్మే పరిస్థితి లేదన్నారు. ఓఎన్‌జీసీ పైపులైన్లతో నష్టపోయిన మత్స్యకారులకు ఇచ్చే పరిహారం కేంద్ర ప్రభుత్వానిదని.. అదేదో తానే సొంతంగా జేబులోంచి ఇస్తున్నట్లుగా జగన్‌ ఫోజులు కొట్టడం హాస్యాస్పదని విమర్శించారు.

సీఎం జగన్మోహన్ రెడ్డి మాటలు తేనెపూసిన కత్తులని విమర్శించారు. మాయ మాటలతో ఇంకెన్నాళ్లు మోసం చేస్తారని యనమల ఆగ్రహం వ్యక్తం చేశారు. జగన్‌ మూడేళ్ల నిర్వాకాలను ప్రజలే నిలదీస్తున్నారని.. ఇంకెన్నాళ్లు ప్రతిపక్షాలను ఆడిపోసుకుంటారని ప్రశ్నించారు. జగన్‌ దోపిడీ సొమ్మును ప్రభుత్వ ఖజానాకు జమ చేస్తే ఇంత ఆర్థిక సంక్షోభం ఉండేదా? అని యనమల రామకృష్ణుడు వ్యాఖ్యానించారు.