కడప: రెండోసారి కరోనా.. యువ వైద్యుడి మృతి

కరోనా వైరస్ రెండోసారి సోకుతున్న కేసులు ఇప్పటికే అనేకం నమోదయ్యాయి. అయితే.. ఇలాంటి కేసుల్లో ఎక్కువ శాతం మంది మొదటిసారి కోలుకున్నట్లే రెండోసారి కూడా కొవిడ్ నుంచి కోలుకుంటున్నారు. కానీ, కొంత మందిలో మాత్రం రెండోసారి వైరస్ తీవ్రమైన లక్షణాలతో దాడి చేస్తోంది. కడప జిల్లాలో ఇలాగే రెండోసారి వైరస్ సోకిన ఘటనలో ఓ యువ వైద్యుడు బలయ్యాడు. ఇప్పటికే కరోనా వైరస్ బారినపడి కోలుకున్న ఆయన.. తిరిగి విధుల్లో చేరి ప్రభుత్వ వైద్యుడిగా విలువైన సేవలు అందిస్తున్నారు. ఈ క్రమంలో రెండోసారి కరోనా బారినపడి మరణించడం స్థానికంగా తీవ్ర విషాదం నింపింది.

చిన్న పిల్లల స్పెషలిస్టు అయిన డాక్టర్ నందకుమార్ (28) కడప జిల్లా బద్వేల్ ప్రభుత్వ హాస్పిటల్‌లో పనిచేస్తున్నారు. ఆయనకు 3 నెలల కిందట కరోనా వైరస్ సోకింది. దీంతో గుంటూరులోని ఎన్‌ఆర్‌ఐ హాస్పిటల్‌లో చికిత్స తీసుకున్నారు. అనంతరం కోలుకొని ఇంటికి తిరిగి వెళ్లిపోయారు. ఆ తర్వాత యథావిధిగా బద్వేల్ ప్రభుత్వ ఆస్పత్రిలో తన విధులకు హాజరయ్యారు.

15 రోజుల కిందట జ్వరం రావడంతో డాక్టర్ నందకుమార్ మరోసారి కరోనా నిర్ధారణ పరీక్షలు చేయించుకున్నారు. ఈ పరీక్షల్లో పాజిటివ్‌గా తేలింది. మొదట్లో ఇంటి వద్దే (Home Isolation) ఉండి చికిత్స తీసుకున్నారు. కానీ, రోజులు గడిచేకొద్ది లక్షణాలు తగ్గకపోవడంతో వైద్యుల సూచన మేరకు తిరుపతి స్విమ్స్‌లో చేరారు. అక్కడ చికిత్స పొందుతుండగా ఆయన ఆరోగ్యం మరింత క్షీణించింది. పరిస్థితి విషమించడంతో రెండు రోజుల కిందట చెన్నైలోని అపోలో హాస్పిటల్‌కు తరలించారు. అక్కడ చికిత్స పొందుతూ ఆదివారం మధ్యాహ్నం కన్నుమూశారు.

డాక్టర్ నందకుమార్ మృతితో ఆయన కుటుంబసభ్యులు కన్నీరుమున్నీరవుతున్నారు. చిన్న వయసులోనే వైద్య వృత్తిలోకి వచ్చిన నందకుమార్.. ఎంతో భవిష్యత్తు ఉండగా కరోనా మహమ్మారి బలి తీసుకుందని కుటుంబసభ్యులు, తోటి డాక్టర్లు, బద్వేల్ హాస్పత్రి సిబ్బంది ఆవేదన వ్యక్తం చేస్తున్నారు.

Also Read: కరోనా సెకండ్ వేవ్‌కు సిద్ధంగా ఉండండి: WHO

Must Read: భర్త, ప్రియురాలిని కలిపిన భార్య.. పెళ్లైన మూడేళ్లకు త్యాగం

Don't Miss: జో బైడెన్: తొలిచూపులోనే ప్రేమ.. కానీ, ఆ సంతోషం ఎన్నో రోజులులేదు!