నగరి: అబార్షన్ వికటించి యువతి మృతి.. ప్రియుడి అరెస్ట్

చిత్తూరు జిల్లా నగరిలో దారుణం జరిగింది. అబార్షన్ వికటించి యువతి చనిపోవడం కలకలం రేపింది. నగరికి చెందిన విజయ్ ఓ యువతిని ప్రేమించాడు. ఇద్దరూ కొద్దిరోజులుగా చనువుగా ఉంటున్నారు. ఈ క్రమంలో ఇద్దరి తొందరపాటుతో యువతి గర్భం దాల్చింది. విషయం పెద్దలకు తెలుస్తుందని భయపడిన విజయ్ ప్రియురాలిని ఒప్పించి.. ఎవరికి తెలియకుండా ఆర్‌ఎంపీ డాక్టర్ దగ్గరకు తీసుకెళ్లి అబార్షన్ చేయించాలి అనుకున్నాడు.విజయ్ వెంటనే స్థానికంగా ఉంటున్న ఆర్‌ఎంపీ డాక్టర్ దేవిని సంప్రదించాడు. ఆమెకు విషయం చెప్పి.. తర్వాత తన ప్రియురాలిని ఆస్పత్రికి తీసుకెళ్లాడు. ఈ క్రమంలో యువతికి అబార్షన్ చేస్తుండగా తీవ్ర రక్తశ్రావం కావడంతో.. ఆమె అక్కడికక్కడే చనిపోయింది. విషయం బయటకు రావడంతో ఆర్‌ఎంపీ డాక్టర్ దేవి పరారయ్యింది. దీంతో ప్రియుడు విజయ్‌ను పోలీసులు అరెస్ట్ చేశారు.

యువతి మరణంతో తల్లిదండ్రులు కన్నీరమున్నీరవుతున్నారు. తమ కూతురి మరణానికి కారణమైన విజయ్‌ను కఠినంగా శిక్షించాలని డిమాండ్ చేస్తున్నారు. పోలీసులు పరారీలో ఉన్న ఆర్‌ఎంపీ డాక్టర్ కోసం గాలిస్తున్నారు. అలాగే ప్రియుడు విజయ్‌ను ప్రశ్నిస్తున్నారు. ఈ కేసుకు సంబంధించిన పూర్తి వివరాలు తెలియాల్సి ఉంది.